नुवाकोटमा सबै स्थानीय तहले गाउँ/नगरसभा सम्पन्न गरेका छन् ।

स्थानीय तहमा बुधवार आयोजित सभामा १२ वटै स्थानीय तहले नीति तथा कार्यक्रम र बजेट पेश गरेका छन् । 

जिल्लाका सबै स्थानीय तहमा गरी ६ अर्ब ७ करोड ९० लाख रुपैयाँको बजेट प्रस्तुत भएको छ । सबैभन्दा बढी विदुर नगरपालिकाको १ अर्ब ८ करोड रुपैयाँ बजेट पेश भएको छ । 

बेलकोटगढी नगरपालिकाको ९९ करोड ९३ लाख रुपैयाँको बजेट पेश भएको छ । गाउँपालिका शिवपुरीले ४९ करोड २५ लाख, ककनीले ४३ करोड, दुप्चेश्वरले ४१ करोड, पञ्चकन्याले ४० करोड ९३ लाख, किस्पाङले ४० करोड २ लाख, तारकेश्वरले ३९ करोड ६८ लाख, सूर्यगढीले ३८ करोड १२ लाख, लिखुले ३७ करोड ७८ लाख र तादीले ३६ करोड १९ लाखको बजेट तथा कार्यक्रम सभामा पेश गरेका छन् ।

जिल्लामा सबैभन्दा कम म्यागङ गाउँपालिकाको बजेट ३४ करोड गाउँसभामा पेश भएको छ । पेश भएको नीति तथा कार्यक्रम र बजेट केही स्थानीय तहले पारित गरिसकेका छन् भने केहीले छलफलपछि पारित गरिने जनाएका छन् । 

सभामा पेश भएको नीति तथा कार्यक्रम र बजेटमा सबै पालिकाले कोरोनाविरुद्ध प्राथमिकता दिएर कार्यक्रम राखेका छन् । कृषि क्षेत्र, सडकलगायत पूर्वाधार विकासमा बजेट धेरै विनियोजन गरेको पाइएको छ ।