चिनियाँ र भारतीय सैनिकहरू भारतले लद्दाख र सिक्किममा दाबी गरेको भूभागका आमनेसामने भएर बसेका छन् । अरुणाचल प्रदेशमा समेत चिनियाँ जनमुक्ति सेनाले गतिविधि बढाएको छ । 

चिनियाँ सेनाले विशाल संख्यामा आफ्ना पोस्टहरू बढाइरहेको अनि गश्ती बढाउँदै लगेर भारतीय सीमा उल्लंघन गरिरहेको भारत सरकारका विभिन्न स्रोतले जनाएका छन् । 
 

तवाङ र वालोङमा चिनियाँ सेनाको गतिविधि बढेको देखिन्छ । ती दुई ठाउँमा चीनले सन् १९६२ को युद्धमा निकै क्षति पुर्‍याएको थियो । 
 

तवाङमा चिनियाँ सैनिकको गश्ती भारतको खिन्जेमाने पोस्टसम्म आइपुगेका छन् र भारतीय सैनिकलाई भगाएका छन् । खिन्जेमाने मकमाहोन लाइनमा पर्छ र सन् १९५९ को मार्च महिनामा दलाई लामा त्यहीँबाट भारत प्रवेश गरेका थिए । 
 

तवाङमा चिनियाँ सेनाले त्सोना जोङस्थित आधारशिविरलाई मजबूत बनाएको छ । तिब्बत सीमाको उक्त ठूलो शहर मकमाहोन लाइनपारि छ । 
 

वालोङ सेक्टरमा चिनियाँ गश्तीहरूले आक्रामक गतिविधि गरिरहेको बताइएको छ । किबिथू भन्ने ठाउँमा भारतीय पोस्ट छ र त्यहाँ चीन आक्रामक भइरहेको छ । अनि वालोङपारि तिब्बती शहर रिमामा चिनियाँ सैनिकको संख्या बढेको छ । 
 

किबिथूपारि ओल्ड टाटुमा रहेको चिनियाँ सैन्य शिविरमा पनि संख्या बढाइएको छ । 

अनि आसाफिला सेक्टरमा पनि चीनको गतिविधि आक्रामक बनेको छ । त्यस ठाउँलाई सन् १९६२ मा चिनियाँहरूले आक्रमण गरेर कब्जामा लिएका थिए । चिनियाँहरूले केपाङ ला र सीङ ला पासहरूमा पनि अस्थायी शिविर बनाएको बताइन्छ । 

माथिल्लो सियाङमा पछिल्ला केही दिनमा सीमा पार गरेर चिनियाँहरू आइरहेको देखिन्छ । 

भारतको सैन्य जासूसी संयन्त्रले चिनियाँहरू भारतमाथिको आक्रमण गर्ने सम्भावनाका कारण सैनिक संख्या बढाइरहेका हुन् कि भारतीय भूभागमा नियन्त्रण जमाउन खोजिरेहका हुन् भनी हेरिरहेका छन् ।