नेपाल कम्युनिष्ट पार्टी (नेकपा) रुपन्देहीले नेतृत्वलाई थप जिम्मेवारीका साथ एकतावद्ध हुन अपील गरेको छ।

नेकपाको जारी स्थायी कमिटीको बैठकमा नेताहरुले अध्यक्ष समेत रहेका प्रधानमन्त्री केपी शर्मा ओलीको राजीनामा माग्नुका साथै पार्टीमो कलह बढिरहेका बेला नेकपा रुपन्देहीले सहमतीय पद्धति अवलम्बन गर्न, पार्टी पंक्ति र आम जनतामा सकारात्मक सन्देश प्रवाह गर्न अपील गरेको हो।

नेकपा केन्द्रीय सदस्य तथा रुपन्देही इन्चार्ज लिला गिरी, केन्द्रीय सदस्य तथा रुपन्देही सह–इन्चार्ज दधिराम न्यौपाने, केन्द्रीय सदस्य तथा रुपन्देही सह–इन्चार्ज एकराज विश्वकर्मा, जिल्ला कमिटी अध्यक्ष शिवराज सुवेदी र जिल्ला कमिटी सचिव नारायणबहादुर जिसी (निर्मल) ले बुधबार एक प्रेस नोट जारी गर्दै स्थायी कमिटी बैठकमा व्यक्त धारणाहरुलाई लिएर पार्टी पंक्ति एवं आम नागरिकहरुमा उत्पन्न चासो र चिन्ताप्रति नेकपा रुपन्देहीको गम्भिर ध्यानाकर्षण भएको बताएका हुन्।

‘नेपालमा विभाजित कम्युनिष्ट आन्दोलनलाई एकिकृत गर्दै समाजवाद स्थापनाको ऐतिहासिक कार्यभार सहित मुलुकका दुई ठूला कम्युनिष्ट पार्टीहरु एकतावद्ध भएको हामी सबैका बिच जगजाहेर नै छ,’ प्रेस नोटमा भनिएको छ, ‘पार्टी एकताको मुल भावना अनुरुप पार्टी एकताको बाँकी कार्यलाई टुंगोमा पु¥याई सम्पूर्ण पार्टी पंक्तिलाई एकतावद्ध र उर्जा प्रदान गर्दै अगाडि बढ्नुपर्ने ऐतिहासिक जिम्मेवारी पुरा गर्न जारी स्थायी कमिटी बैठक सफल हुने कुरामा हामी पूर्ण रुपमा विवस्त छौं ।’ 

मुलुक सामु उत्पन्न कोभिड–१९ को महामारी, सिमा समस्या र आर्थिक संकटलाई समाधान गर्न सिंगो राष्ट्रिय एकताका साथ अगाडि बढ्नु आजको मूल कार्यभार रहेको औँल्याइएको छ। 

पार्टीभित्र आन्तरिक सहमति नभएको भन्ने सन्देश सार्वजनिक गर्ने कुराले नेता, कार्यकर्ता र आम जनसमुदायमा नकारात्मक सन्देश प्रवाह गरिरहेको समेत नेकपा रुपन्देहीले बताएको छ।