खुमलटार छलफल : 'पार्टी फुटाउनु हुँदैन, समझदारी गरेर अघि बढ्नुपर्छ'

फाइल फोटो

सत्तारूढ दल नेपाल कम्युनिस्ट पार्टी (नेकपा)भित्र उत्कर्षमा पुगेको विवाद समाधानका उपायहरूबीच भेटघाट र छलफल जारी छ । 

अध्यक्ष पुष्पकमल दाहाल 'प्रचण्ड'ले ओली समूहका केही नेताहरूसँग बिहीवार आफ्नो निवास खुमलटारमा छलफल गरेका थिए ।


Advertisement

छलफलमा पार्टीभित्र समझदारी बढाएर अघि बढ्ने निष्कर्ष निकालिएको छलफलमा सहभागी स्थायी कमिटी सदस्य हरिबोल गजुरेलले लोकान्तरलाई बताए । 

'आवश्यकताअनुसार दुवै अध्यक्षले त्याग गरेर जानुपर्छ र फूटबाट पार्टीलाई जोगाउनुपर्छ भन्ने कुरामा समझदारी भएको छ,' गजुरेलले भने, 'एउटाले अर्कोलाई नटेर्ने हो भने पार्टी दुर्घटनामा जान्छ । पार्टी नफुटाउने हो भने मिलेर जानुपर्छ । दुर्घटना भयो भने दुवै पक्ष सकिन्छन् ।' 


Advertisement

छलफलमा प्रचण्ड शुरूमा बोलेका थिए । उनले समस्या कहाँबाट पैदा भएको हो भनेर सोच्न ओलीसमूहका नेताहरूलाई आग्रह गरे ।

'समस्या कहाँबाट आएको हो साथीहरूले बुझ्नुपर्छ,' प्रचण्डको भनाइ उदृत गर्दै सहभागी एक स्थायी कमिटी सदस्यले भने, 'अध्यक्ष प्रचण्डले कडैसँग आफ्ना कुराहरू राख्नुभयो । उहाँले समस्या आफूमा पनि भएको तर त्यो भन्दा बढी समस्या ओलीमा देखिएको छ भनेर भन्नुभयो ।'

खुमलटारमा पार्टी एकतालाई कायमै राख्ने तर जहाँबाट बाटो भुलेको हो त्यहीँ गएर समाधान खोज्नुपर्ने विषयमा भद्र सहमति भएको छ । 

'यदि दुवै पक्ष सिद्धिनबाट जोगिने हो भने अहिले फूटबाट जोगिनुपर्छ,' गजुरेलले भने, 'जहाँबाट बाटो भुलेको हो त्यहीं फर्किनुपर्‍यो । समस्या कहाँबाट शुरू भयो भन्ने कुरा लाई लिएर समाधानको बिन्दु पहिल्याउनु पर्छ ।' 

बैठकमा राजीनामाको विषय पनि उठेको थियो । 'राजीनामा स्थायी कमिटी बैठकमा आएको कुरा हो, निर्णय भइसकेको छैन,' गजुरेलले भने, 'तर एकले अर्कोलाई मिनिमाइज गर्ने र पेलेर जाने भन्ने कुरा नसोचे हुन्छ ।' 

गजुरेलले थपे - 'ओलीले प्रचण्डलाई मिनिमाइज गर्दा यस्तो अवस्था आयो, अब प्रचण्डले ओलीलाई मिनिमाइज गरेर जाँदा त्यही समस्या दोहोरिन्छ । त्यसैले आवश्यकता अनुसार त्याग गर्न दुवै अध्यक्ष तयार हुनुपर्छ । पार्टी अप्ठ्यारै ठाउँमा पुगेको हो, तर फेरि पनि नयाँ समझदारी गरेर अघि बढ्नुको विकल्प छैन ।'

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्