सत्तारूढ दल नेपाल कम्युनिस्ट पार्टी (नेकपा)का ६ सचिवालय सदस्यले स्थायी कमिटी बैठक नै सर्वोपरी भएकाले जे निर्णय हुन्छ त्यो मानेर अघि बढ्ने सहमति गरेका छन् ।

शनिवार अपराह्न अध्यक्ष पुष्पकमल दाहाल ‘प्रचण्ड’निवास खुमलटारमा प्रचण्डसहित वरिष्ठ नेताद्वय झलनाथ खनाल र माधवकुमार नेपाल, उपाध्यक्ष वामदेव गौतम, प्रवक्ता नारायणकाजी श्रेष्ठ र गृहमन्त्रीसमेत रहेका रामबहादुर थापा ‘बादल’को भेलाले स्थायी कमिटीको बैठकले नै सबै विषयको छिनोफानो गर्ने सहमतिका साथ अघि बढ्ने निर्णय गरेको हो ।

भेलामा सहभागी एक सचिवालय सदस्यले लोकान्तरसँग भने, ‘केही दिन स्थगित मात्र भएको हो, नत्र स्थायी कमिटी बैठक जारी छ । सबै कुरा त्यहाँ नै छिनोफानो हुन्छ । बैठकको निर्णय मान्नु सबै नेता कार्यकर्ताहरूको कर्तव्य हो ।’

उनले विवाद समाधानका लागि प्रधानमन्त्री नै बाधक बनेकाले स्थायी कमिटी बैठकभन्दा अन्त सहमति र निर्णय हुन नसक्ने दाबी गरे । सहमतिका लागि अध्यक्षद्वयहरू लागिरहनु भएको छ नि ? भन्ने प्रश्नमा उनले भने, ‘सहमति हुने विषयको निर्णय पनि कमिटीकै बैठकले गर्छ । कमिटी भन्दा बाहिर कोही छैन ।’

सहमतिकै लागि भनेर शनिवार बोलाइएको स्थायी कमिटी बैठक सोमवारसम्मका लागि स्थगित गरिएको थियो । शनिवार अध्यक्षद्वय ओली र प्रचण्डको भेटघाट तोकिएको थियो । तर यो समाचार लेख्दासम्म अध्यक्षद्वयको भेटघाट तय भएको छैन ।

खुमलटारनिकट स्रोतले अध्यक्षद्वयको भेटघाट आइतवार हुनेगरी सारिएको जानकारी दिएको छ । ‘उहाँहरू(ओली र प्रचण्ड)बीच बिहान एकपटक फोनमा कुराकानी भएको थियो, त्यसपछि भएको छैन,’ स्रोतले भन्यो, ‘अब भोलि अध्यक्ष प्रचण्ड बालुवाटार जाने सेड्युल बन्छ होला ।’

शनिवार बिहान पनि प्रचण्डले आफ्नो निवासमा वरिष्ठ नेता नेपाल लगायतका केही अन्य नेताहरूलाई बोलाएर छलफल गरेका थिए ।

यता साँझ करीब छ बजे राष्ट्रपति विद्यादेवी भण्डारीलाई भेट्न अध्यक्षसमेत रहेका प्रधानमन्त्री ओली शीतलनिवास पुगेका छन् । साँझ ७ बजे सरकारका मन्त्री र राज्यमन्त्री सबैलाई बालुवाटार बोलाइएको छ । पछिल्लो राजनैतिक घटनाक्रम र समसामयिक विषयमा कुरा गर्न उनले बोलाएको एक मन्त्रीले लोकान्तरलाई जानकारी दिए ।