सोमवार बस्ने स्थायी कमिटी बैठकअघि पुनः छलफल गर्नेगरी नेकपाका अध्यक्षद्वय प्रधानमन्त्री केपी शर्मा ओली र पुष्पकमल दाहाल 'प्रचण्ड'बीच आइतवार कुराकानी भएको छ ।

आइतवारको वार्ता सकारात्मक रहेको वार्तामा सहभागि नेता जनार्दन शर्माले लोकान्तरलाई जानकारी दिए । ‘आजको वार्ता सकारात्मक छ, थप छलफल गरेर निकास खोज्ने सहमति भएको छ,’ शर्माले भने ।

नेकपाभित्रको शक्तिसंघर्ष उत्कर्षमा पुगेपछि आइतवार भएको ओली र प्रचण्डबीचको भेटघाटलाई चासोका साथ हेरिएको थियो । भेटघाटमा सहमति गर्ने सहमति भएको छ ।

ओलीसँगको भेटवार्तापछि प्रचण्ड निवास खुमलटारमा पुगेका छन् । प्रधानमन्त्री निवास बालुवाटारमा मध्याह्न भएको डेढघण्टा लामो वार्तामा दुवै पक्ष आफ्नो अडानमा कायमै रहेका थिए तर निकासका कुनै न कुनै निष्कर्षमा पुग्ने भन्दै थप छलफल गर्ने सहमति गरेका हुन् ।

दुई-दुई जना सहयोगीसहित भएको ओली प्रचण्ड भेटवार्तामा दुवै पक्षले आफ्नो पूर्ववत् अडान कायम राखेका छन् । आवश्यक परे कार्यदल नै बनाएर सहमतिको बिन्दू पहिल्याउन दुवै पक्ष तयार भएका छन् ।

स्रोतका अनुसार आइतवारको बैठकमा राष्ट्रपतिविरुद्ध षडयन्त्र भएको भन्ने ओलीको शनिवारको अभिव्यक्तिबारे प्रचण्डले प्रश्न गरेका थिए ।

‘हामीहरुबीच छलफल नै नभएको विषयमा तपाईले किन त्यस्तो अभिव्यक्ति दिनुभयो ? राष्ट्रपतिलाई अनावश्यक विवादमा तान्ने काम राम्रो भएन,’ प्रचण्डको भनाइ उद्धृत गर्दै स्रोतले भन्यो ।

ओलीसँगको भेटअघि प्रचण्ड लगायतका नेताहरुले राष्ट्रपति भण्डारीसँग परामर्श गरेका थिए ।

आजको वार्तामा महासचिव विष्णु पौडेल, शंकर पोखरेल तथा वर्षमान पुन र जनार्दन शर्मा सहभागी थिए ।

गत शुक्रवारको बैठकमा प्रचण्डले आलोपालो सरकारको नेतृत्व गर्नेगरी २०७५ जेठ २ गते भएको सहमतिमा फर्किन प्रस्ताव गरेका थिए भने ओलीले प्रचण्डलाई कार्यकारी अध्यक्ष बनाउने २०७६ मंसिरको प्रस्तवलाई थप व्याख्या गरेर जान प्रस्ताव गरेका थिए ।