चौथो जिल्ला सभाले राष्ट्रबादी स्वर्गिय नेता प्रेमसिंह धामी प्रति सम्मानसहित प्राथमिकता दिएको छ ।

राष्ट्रबादी स्वर्गिय नेता प्रेमसिंह धामीको योगदायनलाई सम्मान गर्दै जिल्ला सभाले विभिन्न महत्वपूर्ण निर्णयहरु गरेको हो ।

कालापानीको विषयलाई राष्ट्रिय मुद्दा बनाइनुपर्ने, कालापानी नेपालको मुटु हो लगायतका आवाजहरु सदनमै उठाउने पहिलो व्यक्तिका रुपमा परिचित राष्ट्रबादी स्वर्गीय नेता प्रेमसिंह धामीकै नामबाट सतबाँजदेखि खलंगा सडकको नामांकरणका लागि माग गर्ने निर्णय गरेको छ ।

दार्चुलाको चौथौ जिल्ला सभाले सतबाँज–गोकुलेश्वर–खलंगा सडकको नाम प्रेमसिंह धामी माग नामांकरणका लागि संघीय सरकारलाई अनुरोध गर्ने निर्णय गरिएको सभामा सहभागि मार्मा गाउँपालिका अध्यक्ष जमन सिंह धामीले बताए ।

सुदूरपश्चिम प्रदेश सरकारले विभिन्न चार विभूतिको कैलालीमा पूर्ण कदको सालिक बनाउने निर्णय गरेपनि राष्ट्रबादी स्वर्गीय नेता प्रेमसिंह धामीलाई छुटाएको थियो । प्रदेश सरकारले जयपृथ्वी बहादुर सिंह, दशरथ चन्द ठाकुर, भीमदत्त पन्त, पहलमान स्वाँरको कैलाली चोकमा पूर्ण कदको सालिक बनाउने निर्णय गरेको हो । प्रेमसिंह धामीलाई छुटाएको र बिर्सेको भन्दै यसअघि नेकपा दार्चुलाले आपत्ति जनाउदै सालिक निर्माणका लागि प्रदेश सरकारलाई अनुरोध समेत गरेको थियो । 

साथै चौथो जिल्ला सभाले पनि प्रेमसिंह धामीको सालिक पनि चार विभूतिहरुसंगै निर्माण गर्न प्रदेश सरकारलाई अनुरोध गर्ने निर्णय गरिएको नौगाड गाउँपालिका अध्यक्ष प्रेमसिंह धामीले बताए । राष्ट्रियताका सवालमा अब्बल र निडर दार्चुलाका वक्ता, राष्ट्रबादी स्वर्गीय नेतालाई कालापानीको विषय विवाद आउदाँ सबैले सम्झिने गरेका छन् ।

पछिल्लो समय सरकारले भारतद्धारा अतिक्रमित नेपाली भूमि लिम्पियाधुरा, लिपुलेक, कालापानी सहितको नक्सा जारी गरेकाले स्वर्गिय नेता धामीको सपना साकार हुने अपेक्षा पनि लिइरहेका छन् । 

नेपाल सरकारले अतिक्रमित नेपाली भूमि समेटेर नक्सा सार्वजनिक गरेको र तिंकर सडक निर्माणको जिम्मेवारी नेपाली सेनालाई दिएको भन्दै सरकारलाई धन्यबाद ज्ञापन गर्ने निर्णय पनि गरिएको नौगाड गाउँपालिका अध्यक्ष धामीले बताए ।