अलिक सन्काहा पारका अमेरिकी व्यवसायी इलोन मस्कले वामपन्थी बुद्धिजीवी नोम चोम्स्कीको कठोर आलोचना गरेका छन् । चोम्स्कीले यसअघि मस्कका न्युरोटेक्नोलोजी प्रोजेक्टहरूको आलोचना गर्ने गरेका थिए । 

ट्विटरमा स्पेसएक्स र टेस्ला कम्पनीका मालिक मस्कले सबै केटाकेटीले सुन्नुपर्ने सात कुरा शीर्षकमा एक सूची सार्वजनिक गरे । तीमध्ये एक कुरा हो– जतिपटक प्रयोग गरे पनि कम्युनिजम विफल भएको छ । 

अर्को ट्वीटमा मस्कले लेखे, ‘साइड नोट : चोम्स्कीले दिमाग खान्छन् ।’
 

मस्कलाई समर्थन गर्दै बिहेवियोरल साइकोलोजिस्ट गाद सादले भने, ‘चोम्स्कीले विगत पाँच दशकभन्दा बढी समय राजनीतिका विषयमा बौलाहा कुरा गरिरहेका छन् ।’ 
 

मस्कले जवाफ फर्काए, ‘मूर्खहरूका लागि उनी मस्तिष्क भाइरस हुन् ।’
 

मस्कको ट्वीटमा मिश्रित प्रतिक्रिया आयो । केही प्रयोगकर्ताले उनलाई चोम्स्कीप्रतिको नकारात्मक धारणाको व्याख्या गर्न भने । ‘तार्किक आलोचना गर्नुको साटो नाम काढ्ने काम फेरि गरिएको छ,’ एकजनाले लेखे । 
 

चोम्स्की वामपन्थी विचारधाराका अग्रणी विद्वान् हुन् । उनले मस्कको आक्रमणको जवाफ फर्काइसकेका छैनन् । 

मस्कको न्युरालिंक कम्पनीको भविष्यका विषयमा चोम्स्कीले खुला रूपमा आशंका व्यक्त गरिसकेका छन् । 
 

आरटीबाट