भारत र चीनबीच सीमाविवाद चलिरहेको बेलामा चिनियाँ सेना वास्तविक नियन्त्रण रेखाबाट एक किलोमिटर पछि हटेको भारतीय सञ्चारमाध्यमहरूले लेखेका छन् । 

हिंस्रक भिडन्त भएको स्थानबाट चिनियाँ सेना पछि हटेको बताइएको हो । सैनिक पछि हटाउनका लागि दुवै देशका सैन्य अधिकृत स्तरमा वार्ता चलिरहेको थियो । 

सूत्रहरूलाई उद्धृत गर्दै भारतीय सञ्चारमाध्यमले बताएअनुसार, दुवै देशका सेनाले रिलोकेसनका लागि सहमति जनाएका छन् र पछि हटेका छन् । गलवान उपत्यकालाई अब बफर जोन बनाइएको छ । 

चिनियाँ सेनाले टेन्ट, गाडी र सैनिक पछि हटाउन थालेको बताइएको छ । कोर्प्स कमान्डर स्तरको कुराकानीमा यही कुरा सुनिश्चित भएको थियो । 

तर गलवान उपत्यकामा चीनले सैन्य सामग्रीहरू थुपारिरहेको छ । यस विषयमा दुवै सेनाबीच पछि पनि कुराकानी हुन सक्नेछ ।