गत जनवरी महिनामा अमेरिकाले इराकमा ड्रोन आक्रमण गरेर इरानी जनरल कासिम सुलेमानी तथा नौ अन्य व्यक्तिको हत्या गर्नु अन्तर्राष्ट्रिय कानूनको उल्लंघन भएको संयुक्त राष्ट्रसंघको मानवअधिकार अनुसन्धाताले सोमवार बताएकी छन् । 

अमेरिकाले सुलेमानीको जत्थालाई मार्नुपर्ने गरी आफूमाथिको सम्भावित आक्रमणका विषयमा पर्याप्त प्रमाण दिन नसकेको गैरन्यायिक, पूर्पक्षरहित वा स्वेच्छारी हत्या सम्बन्धी राष्ट्रसंघकी प्रतिवेदक एग्निस कालामार्डले बताइन् । 

उक्त आक्रमणले संयुक्त राष्ट्रसंघको बडापत्रको उल्लंघन गरेको भनी कालामार्डले प्रतिवेदनमा लेखिन् । प्रतिवेदनमा सशस्त्र ड्रोनमार्फत तारो बनाएर गरिने हत्याप्रतिको जवाफदेहिता तथा हतियारहरूको थप नियमनका विषयमा आह्वान गरिएको छ ।

‘ड्रोन उपयोगको सन्दर्भमा विश्व अहिले महत्त्वपूर्ण क्षणमा अझ चरम स्थितिमा छ । सुरक्षा परिषद्को सार्थकता छैन अनि अन्तर्राष्ट्रिय समुदाय चाहेर होस् नचाहेर होस् मौन छ,’ कालामार्डले रोयटर्स समाचार संस्थालाई बताइन् । 
 

कालामार्डले प्रतिवेदन मानवअधिकार परिषद्समक्ष बिहीवार बुझाउने कार्यक्रम छ । यसबाट सदस्य मुलुकहरू कुन कारवाही अघि बढाउनुपर्ने हो भन्ने विषयमा छलफल गर्ने अवसर पाउनेछन् । अमेरिका यस परिषद्को सदस्यताबाट दुई वर्षअघि नै हटिसकेको छ ।