अमेरिकाका राष्ट्रपति डोनल्ड ट्रम्पले अमेरिकालाई विश्व स्वास्थ्य संगठनबाट झिक्नका लागि औपचारिक प्रक्रिया शुरू गरेका छन् । 

गत मे महिनामै उनले यसो गर्ने इच्छा व्यक्त गरिसकेका थिए । कोरोनाभाइरस महाव्याधिको सन्दर्भमा विश्व स्वास्थ्य संगठन चीनको नियन्त्रणमा रहेको उनले आरोप लगाएका थिए । 

युरोपेली संघ तथा अन्य निकायको आह्वानका बावजूद उनले संयुक्त राष्ट्रसंघको यो निकायबाट हट्ने र यसलाई दिइँदै आएको रकम अन्तै लगानी गर्ने बताएका थिए । 

उनले राष्ट्रसंघ र अमेरिकी संसद् कंग्रेसलाई आफ्नो उद्देश्यका विषयमा जानकारी दिइसकेका छन् । यो प्रक्रिया पूरा हुन एक वर्ष लाग्नेछ । 

राष्ट्रसंघका महासचिवकी प्रवक्ता स्टेफानी दुजारिकका अनुसार, अमेरिकाले संगठनबाट हट्ने सूचना दिइसकेको छ । सन् २०२१ को जुलाई ६ बाट लागू हुने गरी अमेरिका संगठनबाट हट्दैछ ।

अमेरिकी संसद्को विदेश मामिला समितिका सदस्य डेमोक्रेट सांसद सिनेटर रोबर्ट मेनेन्डेजले ट्विटरमा लेखे, ‘महाव्याधि चलिरहेको बेलामा राष्ट्रपतिले अमेरिकालाई विश्व स्वास्थ्य संगठनबाट झिकेको सूचना कंग्रेसलाई पठाएका छन् । यसले अमेरिकालाई बिरामी र एक्लो बनाएको छ ।’

ट्रम्पका प्रतिद्वन्द्वी जो बाइडनले राष्ट्रपति बनेको पहिलो दिन अमेरिकालाई विश्व स्वास्थ्य संगठनको पुनः सदस्य बनाउने बताएका छन् । 

बीबीसीबाट