गुप्तचर अधिकारीहरु नेपालमा सक्रिय रहेको भारतीय मिडियाको दाबी

नेकपाको स्थायी कमिटीको महत्त्वपूर्ण बैठकअघि भारतका पक्षमा समर्थन बढाउनका लागि भारतीय गुप्तचर अधिकारीहरू काठमाडौंमा डेरा जमाएरै बसेको भारतबाट प्रकाशन हुने द पायोनीयर नामक अन्लाइन पत्रिकाले खबर दिएको छ । 

राकेश के सिंहको बाइलाइनमा प्रकाशित खबरअनुसार, जासूसी संस्था रअका प्रमुख सामन्त कुमार गोयल र इन्टेलिजेन्स ब्यूरोका प्रमुख अरविन्द कुमारले विभिन्न दलका नेताहरूसँगको भेटघाट तीव्र बनाएका छन् । चिनियाँ राजदूतले नेकपा नेताहरूलाई भेटिरहेको बेलामा भारतीय गुप्तचर अधिकारीहरू पनि सक्रिय बनेका हुन् । 


Advertisement

गोयल र कुमारले नेपाली नेताहरूलाई भेटेर क्षति नियन्त्रणको काम गरिरहेका छन् । कालापानी, लिपुलेक, लिम्पियाधुरालाई समेटेर नेपालले नक्सा जारी गर्दै त्यसलाई संवैधानिक मान्यता दिएपछि भारतीय गुप्तचर अधिकारीहरू सक्रिय बनेका हुन् । उनीहरूलाई भारतका राष्ट्रिय सुरक्षा सल्लाहकार अजित डोभलले सीधै निगरानी गरिरहेको बताइएको छ ।

भारतीय अधिकारीहरूले पुष्पकमल दाहाल प्रचण्ड, माधव कुमार नेपाल, झलनाथ खनाल, नारायणकाजी श्रेष्ठ, केशव बडाल लगायतका नेताहरूलाई भेटिसकेका छन् । उनीहरूले ओली निकटका नेता शंकर पोखरेल र ओलीका परराष्ट्र मामिला सल्लाहकार राजन भट्टराईलाई पनि भेटिसकेको बताइएको छ । 


Advertisement

विपक्षी दल नेपाली कांग्रेसका सभापति शेरबहादुर देउवाका साथै डा मिनेन्द्र रिजाल, विमलेन्द्र निधि र कृष्ण सिटौलालाई पनि भारतीय जासूसी निकायका शीर्ष अधिकारीहरूले भेटेको स्रोतले जानकारी दिएको छ । 
 

मधेशवादी दलका नेता महन्थ ठाकुर, उपेन्द्र यादवका साथै डा बाबुराम भट्टराईसँग पनि उनीहरूले भेटघाट गरेको बताइएको छ ।  

भारतको नेपालसँग गहिरो सभ्यतागत तथा सांस्कृतिक सम्बन्ध छ तर नेपाली नक्साको संशोधनले दुई देशबीचको सम्बन्धमा खलल पुर्‍याउने खतरा रहेको भारतको बुझाइ छ । विश्वासको क्षयीकरणलाई रोक्न अनि सम्बन्धलाई पुनः सही दिशामा ल्याउन नयाँ दिल्लीले उच्चस्तरीय संवाद जारी राखेको स्रोतको भनाइ छ । 
 

एजेन्सी
एजेन्सी

लेखकबाट थप...

कमेन्ट गर्नुहोस्