सिन्धुपाल्चोकमा बुधवार राति करीब साढे ११ बजे आएको बाढी र पहिरोमा परी २ जनाको मृत्यु भएको छ भने हालसम्म २० जना बेपत्ता रहेका छन् ।

घाइते भएका ४ जनालाई नेपाली सेनाको हेलिकप्टरमार्फत काठमाडौं ल्याइएको जिल्ला प्रहरी कार्यालय सिन्धुपाल्चोकका प्रवक्ता डीएसपी माधव काफ्लेले लोकान्तरलाई जानकारी दिएका छन् ।

घटनास्थलमा पुग्दा स्थानीय बासिन्दा अझै त्रसित अवस्थामा थिए । त्यसमध्ये केही ओडारमा बसेर ज्यान जोगाएका भेटिए ।

'राति हामी निदाएका थियौं, साढे ११ बजेतिर गड्याङ-गुडुङ गर्‍यो,' त्रसित मुद्रामा रहेका हिराबहादुर तामाङले लोकान्तरकर्मीसँग भने, 'गड्याङ्ग गर्‍यो, भूकम्प आएजस्तो भयो । बाहिर निस्किँदा बाढी आएको रहेछ । घरबाट भागेर हामीले आफ्नो ज्यान जोगायौं ।'

बाढीमा परेर आफ्नो घर गुमाएका अर्का पीडित दुर्गाबहादुर लामा पनि त्रसित देखिन्थे । उनले घरनजिकै रहेको ओडारमा पुगेर आफ्नो र बच्चाबच्चीको ज्यान जोगाएका रहेछन् । 

'राति १२ बजे पहिरो आइसकेपछि अब मारिने भइयो भन्ने पीर पर्‍यो,' मलिन अनुहारमा भेटिएका लामाले लोकान्तरकर्मीसँग भने, 'परिवारसहित ओडारमा गएर बसियो र ज्यान जोगाइयो । बिहानसम्म त बाढीपहिरोले वितण्डा मच्चाइसकेको थियो । 

त्यस्तै पहिरोको चपेटामा आएको भगवती अधिकारीको घरको पनि अहिले नामोनिसान छैन । 

उनले दुखेसो पोखिन्, 'साढे ११ बजे बच्चाबच्ची लिएर नजिकैको पाखो बारीमा रहेको एउटा खाली घरमा गएर बस्यौं र बाँच्यौं । घर गोठ सबै बगाएर लग्यो अहिले छिमेकीको घरमा आश्रय लिएर बस्नुपरेको छ ।' 

सिन्धुपाल्चोकको बाह्रबीसेमा गएराति गएको पहिरोले तामाङ, लामा र अधिकारी जस्ता कैयनलाई घरबारविहीन बनाएको छ । 

डीएसपी काफ्लेका अनुसार फुर्वा तामाङ र १० दिने शिशुलाई ह्याम्स अस्पताल लगिएको छ भने सविता बस्नेत र सुदेश तामाङको अर्को एक अस्पतालमा उपचार भइरहेको छ ।

घटनामा हालसम्म २ जनाको मृत्यु भएको छ भने २० जना बेपत्ता रहेको डीएसपी काफ्लेले बताए ।