अब बस चढ्ने वित्तिकै साढे २२ रुपैयाँ भाडा

सरकारले मापदण्ड पूरा गरेर जिल्लाभित्र सार्वजनिक यातायात सञ्चालन गर्न दिने भएको छ ।

यही असार २२ गते बसेको मन्त्रिपरिषद् बैठकका निर्णयबारे जानकारी दिन बिहीवार आयोजित नियमित पत्रकार सम्मेलनमा सरकारका प्रवक्ता एवं सञ्चारमन्त्री युवराज खतिवडाले मापदण्ड पूरा गरेर भोलिबाटै लागू हुनेगरी सार्वजनिक सवारी साधन सञ्चालन गर्न सकिने जानकारी गराएका हुन् ।


Advertisement

 जिल्लाभित्र मात्र सञ्चालन हुन पाउने भनिएपनि काठमाडौं उपत्यकाको हकमा भने उपत्यकाभित्र (काठमाडौं, ललितपुर र भक्तपुर)मा चल्न पाउने छन् ।

यसरी सञ्चालन हुने सवारी साधनले सिट क्षमताको आधा मात्र यात्रु राख्न पाउने छन् ।

 एक लहरको एक पंक्तिमा मात्र यात्रु राख्न पाउने र मास्क अनिवार्य गरिएको प्रवक्ता खतिवडाले बताए ।

सवारी चालक र सहचालकले पनि मास्क र पञ्जा अनिवार्यरूपमा लगाउनुपर्नेछ। यसका साथै प्रत्येक दिन यातायातका साधन डिसइन्फेक्सन गर्नुपर्ने व्यवस्था पनि गरिएको छ ।

आधा मात्र यात्रु चढाउन पाउने भएपछि यो व्यवस्था लागू हुँदासम्म ५० प्रतिशत बढी भाडा लिन सक्ने गरी व्यवस्था गरिएको छ।  अब चढ्ने बित्तिकै उपभोक्ताले २२ रुपैयाँ ५० पैसा भाडा तिर्नु पर्नेछ। यसअघि यस्तो भाडा १५ रुपैयाँ थियो। 

सार्वजनिक यातायातजस्तै जिल्लाभित्र ट्याक्सीहरू पनि सञ्चालन हुन पाउने छन् । ट्याक्सीमा चालकबाहेक २ जना मात्र राख्न पाइनेछ । ५ वर्ष मुनिका बालबालिकाको हकमा भने थप राख्न सकिनेछ ।

यसैगरी निजी सवारी साधनमा पनि ५ वर्षभन्दा मुनिका बालबालिका थप राख्न सक्ने गरी व्यवस्था गरिएको प्रवक्ता खतिवडाले जनाएका छन् ।

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्