नेपालमा भारतीय निजी न्यूज च्यानलको प्रशारण बन्द भएपछि आपत्तिजनक अभिव्यक्ति दिएका 'जी न्यूज'का प्रधान सम्पादक सुधीर चौधरीले माफी मागेका छन् ।

'नेपालविरुद्ध भारत सरकारले कुनै कारवाही गर्नै परेन, सेना प्रयोग गर्नै परेन भारतीय मिडियासँग नै डरायो, टीभी एंकरसँग नै डरायो नेपाल' भन्ने आशयको ट्वीट चौधरीले बिहीवार गरेका थिए ।

उक्त ट्वीटको नेपालमात्र होइन भारतमा समेत तीव्र आलोचना भएपछि चौधरीले ट्वीट डिलिट गर्दै माफी पनि मागेका छन् ।

'मेरो ट्वीटका कारण नेपालस्थित हाम्रा दर्शकलाई चोट पुग्यो । भारतमा पनि धेरैले मलाई भन्नुभयो कि– यो ठीक भएन । शायद हुनसक्छ, मैले आवेशमा आएर अनावश्यक प्रतिक्रिया दिएँ । यो अभिव्यक्तिको मञ्च हो, न कि कसैलाई चोट पुर्‍याउने । त्यसकारण खेद प्रकट गर्दै उक्त ट्वीटलाई हटाउँदै छु,' चौधरीले शुक्रवार गरेको अर्को ट्वीटमा लेखेका छन् ।

हेर्नुहोस्, सुधीर चौधरीको ट्वीट :

मेरे इस ट्वीट से नेपाल के हमारे दर्शक आहत हुए हैं।यहाँ भारत में भी बहुत से लोगों ने मुझे लिखा कि ये विचार सही नहीं है।सम्भव है कि मैंने ये खबर आने के बाद आवेश में अनावश्यक प्रतिक्रिया कर दी हो।ये मंच अभिव्यक्ति का है,आहत करने का नहीं।इसलिए खेद जताते हुए इस ट्वीट को हटा रहा हूँ।🙏 https://t.co/mqTL652uOe

— Sudhir Chaudhary (@sudhirchaudhary) July 10, 2020

नेपाल सरकार, विशेष गरी प्रधानमन्त्री केपी शर्मा ओलीप्रति निकै नै तल्लो स्तरमा गिरेर टिप्पणी गर्न थालेपछि नेपाली केबल अपरेटरहरूले बिहीवार साँझदेखि नेपालमा भारतीय न्यूज च्यानलको प्रशारण बन्द गरेका थिए ।