जनउत्थान लघुवित्तको पुँजी ५० करोड पुर्‍याइने

प्रकाश आचार्य
प्रकाश आचार्य

लोकान्तर संवाददाता आचार्य प्रदेश नम्बर ५ बाट रिपोर्टिङ गर्छन् ।

बुटवलमा प्रधान कार्यालय रहेको जनउत्थान सामुदायिक लघुवित्त वित्तीय संस्थाले अधिकृत पुँजी १० करोड रुपैयाँबाट वृद्धि गरी ५० करोड पुर्‍याउने प्रस्ताव गरेको छ ।

संस्थाको शनिवार बुटवलमा भएको ९ औं वार्षिक साधारण सभाले अधिकृत पुँजी ५० करोड बनाउने प्रस्ताव पारित गरेको हो ।


Advertisement

वार्षिक साधारण सभाले आर्थिक वर्ष २०७५/०७६ को मुनाफाबाट हाल कायम रहेको चुक्ता पुँजी ६ करोड ३३ लाख ६० हजारको १.३२ प्रतिशत नगद लाभांश कर प्रयोजनका लागि वितरण गर्ने निर्णय गरेको छ । 

हाल कायम रहेको चुक्ता पुँजीमा २५ प्रतिशतका दरले बोनस शेयर वितरणपश्चात कायम हुने ७ करोड ९२ लाखको १ कित्ता बराबर २ कित्ताको अनुपातमा हकप्रद शेयर जारी गर्ने सर्वसम्मत निर्णय भएको संस्थाका प्रमुख कार्यकारी अधिकृत/कम्पनी सचिव श्रीराम पोख्रेलले जानकारी दिए ।


Advertisement

साधारण सभाको उद्घाटन सञ्चालक समितिका अध्यक्ष बाबुराम विश्वकर्माले गरेका थिए । सो अवसरमा बोल्दै अध्यक्ष विश्वकर्माले संस्थालाई कोभिडको कठिन घडीमा पनि सफलतापूर्वक अगाडि बढाउन अल्पकालीन तथा दीर्घकालीन रणनीतिहरू तयार पारी संस्थालाई अगाडि बढाउने प्रतिवद्धता व्यक्त गरे ।

साधारणसभा उद्घाटन सत्रमा संस्थाका परिकल्पनाकार डा. मानबहादुर विकले विश्वव्यापी रुपमा देखापरेको कोराना भाइरसले विभिन्न खालका चुनौतीहरू खडा गरेकाले नयाँ प्रविधिहरूको प्रयोगमार्फत विद्युतीय कारोबारलाई प्रोत्साहन गर्नुपर्नेमा जोड दिए ।

सञ्चालक रेवन्तबहादुर विश्वकर्माले लघुवित्तले समुदायस्तरमा आर्थिक रुपमा विपन्न र पछाडि पारिएका वर्गको उत्थानका लागि काम गरेको बताउँदै कोरोनासँगै परिमार्जित रुपमा लगानी गर्नुपर्ने बताए ।

संस्थाका पूर्व अध्यक्ष यमबहादुर विके, पूर्व सञ्चालक डा. मेगबहादुर विश्वकर्मा, माधवप्रसाद नेपाल, संस्थापक शंकरप्रसाद पौडेल, यज्ञविक्रम शाही, भीम कुँवर, नरबहादुर विश्वकर्मा (जर्ज इभरेस्ट), सिताराम रसाली, जोगलाल विश्वकर्मा, सर्वसाधारण शेयरधनीको तर्फबाट पशुपति पाठक लगायतले शुभकामना मन्तव्य राखेका थिए ।

यसैबीच भौतिक दूरी र भर्चुअल रुपमा गरिएको साधारण सभाले संस्थापक तथा सर्वसाधारण समूहबाट सञ्चालक समितिमा प्रतिनिधित्व गर्ने ५ जना सञ्चालकको निर्वाचनमा क्रमशः बाबुराम विश्वकर्मा, रेवन्तबहादुर विश्वकर्मा, मानबहादुर विश्वकर्मा, गोकर्णबहादुर कार्की क्षेत्री र नरेन्द्र कँडेल निर्विरोध निर्वाचित भएका छन् । निर्वाचित सञ्चालकलाई निर्वाचन अधिकृत अधिवक्ता पदमबहादुर कार्कीले शपथ गराउँदै प्रमाणपत्र वितरण गरेका थिए । साधारणसभा सम्पन्न भएपश्चात बसेको सञ्चालक समितिको बैठकले बाबुराम विश्वकर्मालाई सञ्चालक समितिको अध्यक्षमा सर्वसम्मत रुपमा चयन गरेको छ ।

लघुवित्तका पूर्वको पर्सादेखि पश्चिमको कञ्चनपुरसम्म तराईका ११ वटा जिल्लाहरू र सोही जिल्लासँग जोडिएका पहाडका ८ वटा जिल्ला गरी जम्मा १९ वटा जिल्लामा ३९ वटा शाखा कार्यालय छन् । सोही अवसरमा एसएमएस अलर्ट सिस्टमको समेत शुभारम्भ गरिएको छ ।

प्रकाश आचार्य
प्रकाश आचार्य

लेखकबाट थप...

कमेन्ट गर्नुहोस्