नेपाल र भारतबीच तनाव घट्नुको साटो बढिरहेको छ, तर दुई देशका नागरिकबीचको सम्बन्धमा त्यसले त्यति ठूलो प्रभाव पार्न सकेको छैन ।

नेपाल र भारतबीच रोटीबेटीको सम्बन्ध छ, भनिन्छ । भन्नुको मतलब दुई देशमा बिहेबारी चल्छ । सीमावारिपारि पारिवारिक सम्बन्धको जालो छ ।

रोटीबेटीकै सम्बन्धका खातिर कोरोना संकटका बीच पनि नेपालको दार्चुला र भारतको धार्चुलालाई जोड्ने झुलाघाट पुल १५ मिनेटका लागि खुल्यो ।

उताबाट जन्तिसहित बेहुला आए, विवाह सकेर १० मिनेटमै बेहुली लिएर भारततर्फ फर्किए ।

पुलको नेपालतर्फको बिन्दुमा पुगेर बेहुलीका बुवाआमाले आशिर्वादसहित छोरी बिदा गरेको खबर भारतीय अनलाइन न्यूज पोर्टल जागरणले छापेको छ ।

भारतको जीवी गाउँका कमलेश चन्द्र बेहुली लिन जन्तिसहित सीमास्थित भारततर्फको पुलसम्म गए । बुवालाई लिएर उनी नेपाल आइपुगे ।

बेहुली राधिकाका परिवार पुलको मुखकै आएर बसेका थिए । १० मिनेटमा टीकाटाला भयो र बेहुलाबेहुलीले फेरो लिए, अनि आशिर्वाद लिएर बिदा भइहाले ।

यो विवाह गत मार्चमा नै तय भएको थियो । तर, कोरोनाका कारण लकडाउन र सीमा सिल भएपछि टर्दै आयो ।

दुवै पक्षले प्रशासनसँग १५ मिनेटका लागि पुल खोल्न अनुमति लिए, अनि विवाह सम्पन्न भयो ।