नेपाली बजारमा सुनको मूल्य प्रतितोला एक लाख रुपैयाँ नजिक पुगेको छ । 

मंगलवार छापावाल सुनको मूल्य प्रतितोला ९८ हजार २ सय रुपैयाँ कायम भएको नेपाल सुनचाँदी व्यवसायी महासंघले जनाएको छ । 

अब १ हजार ८ सय रुपैयाँ मूल्य वृद्धि भएमा सुनको मूल्य प्रतितोला १ लाख रुपैयाँ पुग्ने सहजै अनुमान गर्न सकिन्छ । 

सुनको मूल्य अझै बढ्न जाने र एक लाख रुपैयाँभन्दा माथि हुन सक्ने सुन व्यवसायी तेजरत्न शाक्यले लोकान्तरसँग बताए । 

कोरोना भाइरस (कोभिड–१९) ले विश्वव्यापी रुपमा सिर्जना गरेको महामारीका कारण सुनको मूल्यमा अत्याधिक वृद्धि भएको हो । 

महासंघले मंगलवार तेजावी सुनको मूल्य प्रतितोला ९७ हजार ७ सय ६० रुपैयाँ कायम गरिएको छ ।

यसअघि सोमवार छापावाल सुनको मूल्य प्रतितोला ९६ हजार ३ सय रुपैयाँ रहेको थियो भने तेजावी सुनको मूल्य प्रतितोला ९५ हजार ८ सय ६०  रुपैयाँ कायम भएको थियो । 

चाँदीको मूल्यमा पनि पछिल्लो समय अत्याधिक वृद्धि भएको छ । 

सोमवार १ हजार १ सय ५५ रुपैयाँमा कारोबार भएको चाँदी मंगलवार १ हजार २ सय ४५ रुपैयाँमा कारोबार भइरहेको छ । 

सरकारले गत चैत ११ गतेदेखि मुलुकमा लकडाउन जारी गरेको थियो । लकडाउन जारी हुनुभन्दा अघिल्लो दिन १० गते छापावाल सुनको मूल्य प्रतितोला ७७ हजार रुपैयाँमा कारोबार भएको थियो । 

यस्तै तेजावी सुनको मूल्य ७६ हजार ७ सय रुपैयाँ कायम भएको थियो । 

चैत ११ देखि भदौ १२ गतेसम्म छापावाल सुनको मूल्यमा प्रतितोला २१ हजार २ सय रुपैयाँ वृद्धि भएको छ ।

किन बढ्यो सुनको भाउ ? 

सुन व्यवसायी तेजरत्न शाक्यका अनुसार कोरोना भाइरसको महामारी अन्त्य नभएसम्म सुनको मूल्यमा सुधार हुन सक्ने सम्भावना नदेखेको बताउँछन् ।

उनका अनुसार, पछिल्लो समय कोरोना भाइरसको महामारीमात्रै नभई ठूला अर्थतन्त्र भएमा दुई मुलुकबीचको द्वन्द्वका कारण पनि सुन बजार प्रभावित छ ।

‘महामारीका बीचमा पछिल्लो समय अमेरिका र चीनबीचमा जारी द्वन्दका कारण पनि सुन बजार प्रभावित हुन पुग्यो, सुनको मूल्य १ लाख माथि नै चढ्ने अनुमान छ,’ उनले भने । 

व्यवसाय चौपट
कोरोना महामारीका बीचमा सरकारले जारी गरेको लकडाउनका कारण सुनचाँदी व्यवसाय चौपट भयो ।

विवाह तथा अन्य धार्मिक सँस्कारहरूका समयमा नै लकडाउन हुँदा सुन किनबेच हुन पाएन । जसका कारण सुनचाँदी व्यवसाय प्रभावित भए । अहिले सरकारले लकडाउन अन्त्य गरेको अवस्था छ ।  यद्यपि सुनचाँदी व्यवसायीको पीडा ‘ज्यूँ का त्यूँ’ छ । 

सुनको मूल्यमा आएको अचाक्ली वृद्धिका कारण अहिले बजारमा ग्राहकको आकर्षण छैन । अझै भनौं यसका कारण सुनको माग शून्य जस्तै भएको छ । हिन्दु धर्मावलम्बी महिलाहरूको विषेश चाडका रूपमा तीज नजिकिँदै छ ।

अन्य समयमा यो समयमा सुनको कारोबार बढी हुने गरेपनि मूल्य वृद्धिका कारण अहिले सुनको माग नभएको व्यवसायी शाक्य बताउँछन् । उनी भन्छन्, बजार सुनसान छ, हाम्रो त रोजीरोटी नै गुम्ने अवस्था आयो ।’