कोरोना भाइरस संक्रमणको जोखिम बढेपछि स्याङ्जा सदरमुकाम पुतलीबजार बन्द गरिएको छ ।

नगरपालिका अत्यावश्यक सेवा बाहेकका कार्यालय पूर्ण रुपमा बन्द भएका छन् । यातायात आवागमनमा समेत रोक लगाइएको छ ।

नगरभित्र कोरोना संक्रमण अरु फैलिन नदिने उद्देश्यले अत्यावश्यक कामबाहेक बाहिर ननिस्कन नगरवासीलाई आग्रह गरिएको छ ।

प्रमुख जिल्ला अधिकारी गंगाबहादुर क्षेत्रीका अनुसार मंगलवारदेखि लागू हुने गरी १० दिनका लागि पुतलीबजार सील गरिएको हो ।

जिल्ला कोरोना विपद व्यवस्थापन समितिको बैठकले नगरपालिकाभित्र निषेधाज्ञालाई कडाइ गर्ने निर्णय गरेको छ । सार्वजनिक तथा निजी सवारीसाधन, अत्यावश्यकबाहेक सम्पूर्ण पसल, उद्योगधन्दा बन्द गरिएको छ भने बैंक तथा वित्तीय संस्थाले नियन्त्रित भई स्वास्थ्य सुरक्षा मापदण्ड अपनाई सेवाप्रवाह गर्नुपर्ने निर्देशन दिइएको छ ।

यद्यपि बिहान ६–९ बजेसम्म र बेलुका ५–७ बजेसम्म अत्यावश्यक सामग्री खरिदका लागि पसल खोल्न समयसीमा तोकिएको छ ।

पुतलीबजार नगरपालिकाले पनि अर्को सूचना जारी नभएसम्मका लागि कार्यालयको सेवाप्रवाह बन्द गरेको जनाएको छ । नगर प्रमुख सीमाकुमारी क्षेत्रीद्वारा जारी सूचनामा कोरोना रोकथाम तथा नियन्त्रणका लागि जिल्ला कोरोना विपद् व्यवस्थापन समितिको निर्णयअनुसार अर्को सूचना जारी नभएसम्मका लागि नगरपालिकाबाट सम्पादन हुने अत्यावश्यक बाहेकका सेवा बन्द गरिएको उल्लेख छ ।

जिल्ला प्रहरी कार्यालय स्याङ्जामा कार्यरत प्रहरी कर्मचारीमा एकाएक कोरोना संक्रमण फैलिएपछि सुरक्षा व्यवस्था अपनाउनुपरेको हो । सोमवारसम्म जिल्ला प्रहरी प्रमुख प्रहरी उपरीक्षकसहित २१ जना प्रहरी कर्मचारीमा कोभिड–१९ देखिएकोमा सो संख्या थपिएर मंगलवार ३७ पुगेको छ ।

पुतलीबजार नगरपालिकाका स्वास्थ्य महाशाखा प्रमुख विष्णु काफ्लेका अनुसार मंगलवार १६ जना प्रहरीमा कोरोना पुष्टि भएको छ । साथै १ थुनुवा र १ जना प्रहरीको छोरीमा पनि संक्रमण देखापरेको छ । उनी प्रहरी कार्यालयमै अभिभावकसँग बस्थिन् ।

पुतलीबजारमा हालसम्म प्रहरीसहित करीब ५० जनामा कोरोना संक्रमित पुष्टि भएको छ । तीमध्ये ५ जना निको भएर घर फर्केका छन् ।

गण्डकी प्रदेशमा हालसम्म १ हजार ४३५ कोरोना संक्रमित फेला परेका छन् । तीमध्ये ४ जनाको मृत्यु भएको छ भने १ हजार २१७ जना डिस्चार्ज भइ घर फर्केका छन् । 

प्रदेश सदरमुकाम पोखरामा हुने ल्याब परीक्षणमा हालसम्म २४ हजारको नमूना संकलन गरिएको छ । बुधवार मात्र स्याङ्जा, बागलुङ, म्याग्दी र तनहुँमा गरी ५ जना नयाँ संक्रमित फेला परेका छन् । तीमध्ये म्याग्दीका २ जना छन् ।