सन्दीप लामिछाने भोलि सीपीएल खेल्न जाने तय

नेपाली क्रिकेट खेलाडी सन्दीप लामिछाने क्यारेबियन प्रिमियर लिग (सीपीएल) खेल्न जाने तय भएको छ ।

उनी सीपीएल खेल्न बिहीवार ट्रिनिडाड एन्ड टोबागोतर्फ जानेछन् । 


Advertisement

कोरियन एयरको चार्टर्ड जहाजमा सन्दीप टोबागो जान लागेको उनका व्यवस्थापक रमन सिवाकोटीले जानकारी दिए । यसअघि हवाई उडानको यकिन नहुँदा उनी टोबागो जानेबारे अन्योल थियो ।

‘भोलि बिहीवार उड्ने पक्कापक्की छ, अब कुनै द्विविधा छैन,’ सिवाकोटीले भने । सरकार र अन्य विभिन्न निकायबाट सहयोग प्राप्त भएपछि सन्दीप टोबागो जान सहज भएको उनले बताए ।


Advertisement

टोबागो उड्नुअघि उनले मंगलवार पीसीआर परीक्षण गराएका छन् । सन्दीपले सानेपास्थित स्टार हस्पिटलमा स्वाब परीक्षणका लागि दिएका छन् । परीक्षणको नतिजा बुधवार आउने व्यवस्थापक शिवाकोटीले बताए । 

सीपीएल खेल्नका लागि सन्दीप साउन १७ गतेसम्म पुगिसक्नुपर्नेछ । सरकारले अन्तर्राष्ट्रिय हवाई उडान आगामी भदौ १ गतेदेखि मात्र खोल्ने निर्णय गरेपछि सन्दीपलाई क्रिकेट खेल्नका लागि विदेश जान समस्या भएको थियो ।

सरकारले सहयोग गरेकै कारण सन्दीपको टोबागो यात्रा सहज भएको हो । उनले टोबागो पुगिसकेपछि १४ दिन क्वारेन्टीनमा बस्नु पर्नेछ । 

सन्दीप यस यामको सीपीएलका लागि जमैका तल्लावाहजबाट अनुबन्धित भइसकेका छन् । उनलाई जमैकाले १ लाख ३० हजार अमेरिकी डलर (१ करोड ५६ लाख) मा अनुबन्ध गरेको हो । उनी टीमको मार्की खेलाडी पनि हुन् ।

सन्दीपले यसअघि पहिलो र दोस्रो संस्करणको सीपीएल खेलिसकेका छन् । सीपीएल आगामी भदौ २ गतेदेखि भदौ २५ गतेसम्म चल्नेछ ।

सीपीएलमा जमैकासँगै बार्बेडोस् ट्रिडेन्ट्स, ट्रिनबागो नाइट राइडर्स, गुएना अमेजन वारियर्स, सेन्ट लुसिया जौउक्स र सेन्ट किट्स एन्ड नेभिस प्याट्रिओट्सले प्रतिस्पर्धा गर्नेछन् । सीपीएलमा कूल ३३ खेल हुनेछन् । कोरोना भाइरसका कारण ती सबै खेल विना दर्शक खेलाइने छन् । सन्दीप तेस्रोपटक सीपीएल खेल्ने तयारीमा छन् ।

उनले यसअघि सन् २०१८ मा पहिलोपटक सेन्ट किट्स एन्ड नेभिस पेट्रियट्सबाट खेलेका थिए । त्यसका लागि उनलाई ५ हजार अमेरिकी डलर पारिश्रमिक दिइएको थियो । उनले सो प्रतियोगितामा ५ खेलमा ७ विकेट लिएका थिए । 

दोस्रोपटक सीपीएल सन्दीपले सन् २०१९ मा बार्बाडोस ट्राइडेन्ट्सबाट खेलेका थिए । उनले ६ खेलमा ८ विकेट लिएका थिए । सन्दीपले गत वर्ष ७० हजार अमेरिकी डलर पारिश्रमिक प्राप्त गरेका थिए । यस वर्षको सीपीएलका लागि १९ वर्षीय सन्दीपले आफ्नो अनुबन्धित मूल्य ९० हजार अमेरिकी डलर तोके पनि उनलाई १ लाख ३० हजार डलर दिने सम्झौता भएको छ ।

कमेन्ट गर्नुहोस्