नेपाली सेनाको कल्याणकारी कोषमा आर्थिक बर्ष २०७६/७७ मा ७ अर्ब २९ करोड १९ लाख रुपैयाँ थपिएको छ । आज (शुक्रवार) पत्रकार सम्मेलन गर्दै सेनाले कोषमा १८.९० प्रतिशत थप गर्दै ५१ अर्ब ६१ करोड ४ लाख नगद पुर्‍याएको जनाएको हो । 

विभिन्न स–साना आयोजनमा पूर्णरुपमा सञ्चालन आएको, वित्त कम्पनी तथा बैंकबाट आएको व्याज, ठूला आयोजनामा खर्च नभएको र शान्ति सेना मिसनबाट आएको पैसाले गर्दा कोषमा रकम बढ्न गएको सेनाले बताएको छ ।  

२०७७ असार मसान्तसम्ममा विभिन्न बैंकमा ४५ अर्ब ८६ करोड ८० लाख रुपैयाँ निक्षेप गरिएको र विभिन्न आयोजनमा ५ अर्ब ७४ करोेड २४ लाख रुपैयाँ लगानी गरिएको सेनाले उल्लेख गरेको छ ।

नेपाली सेनाले सुनाचुरी इमल्स प्लान्ट, सैनिक आवास निमार्णका लागि चितवनको घर जग्गा, अक्सिजन प्लान्ट, नेपाली सेना स्वास्थ्य विज्ञान संस्थान, इचंगुनारयाणमा जग्गा खरिद र भवन निर्माण, शुद्ध पिउने पानी प्लान्ट, रिपुमर्दिनी फ्यूल स्टेशन, सिभिल एक्सप्लोसिभ प्लान्ट लगायतमा लगानी गरेको छ ।

चालू आवमा बजेट १९ अर्ब विनियोजन

सैनिक कल्याणकारी कोषले चालू आर्थिक वर्ष २०७७/७८ का लागि १९ अर्ब ७५ करोड ३२ लाख रुपैयाँ बजेट विनियोजन गरेको छ । सेनाले सञ्चालन गर्ने ५ अर्ब ८ करोड, प्रादेशिक अस्पताल, विद्यालय, महाविद्यालयका सुविधा अभिवृद्धि गर्न १ अर्ब १४ करोड ४६ लाख गरी कल्याणकारी कार्यतर्फ ६ अर्ब २३ करोड १२ लाख कल्याणकारी तर्फको बजेट सार्बजनिक गरेको छ । 

यस्तै शान्ति सेना सबै मिसन सञ्चालन तर्फ १३ अर्ब ५२ करोड २० लाख रुपैयाँ विनियोजन गरेको छ ।

शान्ति सेना तर्फको १३ अर्ब मध्ये १० अर्ब २५ करोड शान्ति सेनामा जाने सकल दर्जा र सकल अधिकृतहरूलाई दिने तलब भत्तामा जाने गरेको र बाँकी ३ अर्ब रकम बन्दोबस्तीको सामानमा जाने पत्रकार सम्मेलन जानकारी गराएको छ ।

मिसनबाट आउने पैसामा वृद्धि

शान्ति सेना मार्फत युएन मिसनमा गएको पैसामा वृद्धि भएको सेनाले जनाएको छ  । नेपाली सेनाले बार्षिक शान्ति सेनाबाट १४ अर्ब रुपैयाँ पाएको छ । अघिल्लो बर्ष ९ देखि १० अर्ब आउने गरेकोमा यो बर्ष ४ अर्ब बढी पाएको सेनाले जनाएको छ ।

युगान्डाको फोन्टागूवामा बन्दोबस्तीको सामानहरु स्थापना गरेकाले नेपालबाट लैजाने ढुवानी खर्च बच्नु, मर्मत सम्भार खर्च कम लाग्ने, समय बचत आदि कारणले पनि सेनाले बढी रकम पाएको बताएको छ ।

५ करोड जोखिममा
अघिल्लो वर्ष ८५ करोड जोखिममा रहेको नेपाली सेनाको निक्षेप यो वर्ष ५ करोडमा झरेको सेनाले जनाएको छ । युनाइटेड विकास बैंकमा १५ लाख, नेपाल सेयर मार्केट एण्ड फाइनान्समा २ करोड ३४ लाख, सम्झना फाइनान्ससँग १ करोड, हिमालय फाइनान्ससँग १२ लाग जोखिम निक्षेप गरेको छ । यो निक्षेप यो बर्ष र आगामी वर्षसम्म उठाइसक्ने सेनाले जनाएको छ । 

आफ्नै लगानीमा बूट फ्याक्ट्री

​आगामी आर्थिक वर्षमा बूट फ्याक्ट्रीको लागि नेपाली सेनाले आफ्नै लगानी उद्योग सञ्चालन गर्ने भएको छ । नेपाल सरकारको नीति तथा कार्यक्रममा नेपाली सेनालाई आफुलाई चाहिने सामानको आत्मनिर्भर बनाउनको लागि बुट सञ्चालन गर्ने भनिएको थियो । त्यसै अनुरुपमा सेनाले कल्याणकारी कोषबाट सञ्चालन गर्न लागेको बताएको तर कति लगानीमा खोल्न लागेको भन्ने खुलाएको छैन । 

७ करोड ४३ लाख बेरुजू
नेपाली सेनाको बेरुजू यो आर्थिक बर्षमा ७ करोड ४३ लाख ९४ हजार रुपैयाँ रहेको छ । अघिल्लो आर्थिक बर्ष ०७५/७६ मा २० करोड १८ लाख १७ हजार बेरुजू रहेको नेपाली सेनाको यो बर्ष १२ करोड ७० लाख २३ हजार फर्छ्यौट गरेर ७ करोड मात्र बेरुजू रहेको सेनाले जनाएको छ ।