कर्णाली प्रदेशमा गत वैशाखबाट बाढीपहिरोमा परेर ४३ जनाको मृत्यु भएकाे छ।

कर्णाली प्रदेश प्रहरी कार्यालयका अनुसार बाढीपहिरोका कारणले सयौं घरबारविहीन बनेका छन् भने  ८ जना बेपत्ता भएका छन्। २८ घाइते भएका छन्। 

बाढीपहिरोमा परेर सबैभन्दा बढी मानवीय क्षति कालिकोट भएको र पहिरोको जोखिममा परेर जाजरकोटमा सबैभन्दा बढी विस्थापित भएको कर्णाली प्रदेश प्रहरी कार्यालयका प्रवक्ता तथा प्रहरी वरिष्ठ उपरीक्षक राजेशनाथ बास्तोलाले जानकारी दिए।

‘कालिकोटमा बाढी पहिरोमा परेर २१ जनाको मृत्यु भएको छ। ६ जना वेपत्ता र ९ जना घाइते भएका छन्। कालिकोटमा १३ घरमा पूर्ण क्षति र १ सय १५७ घरधुरी विस्थापित भएका छन्,’ उनले भने, ‘त्यसपछि जाजरकोट जिल्लामा १५ जनाको मृत्यु, २ जना वेपत्ता र ७ जना घाइते भएका छन् भने करिब ५५ घर पूर्ण रुपमा क्षति र करिब ४ सय घरधुरी विस्थापित भएका छन्।’

कर्णाली प्रदेश प्रहरी कार्यालयका अनुसार बाढीपहिरोमा परेर सुर्खेतमा १ जना मृत्यु, ५ घर पूर्ण क्षति, दैलेखमा १ जनाको मृत्यु, ६ जना घाइते, ११ घरमा पूर्ण क्षति, सल्यानमा १ जनाको मृत्यु र रुकुमपश्चिममा ४ जनाको मृत्यु, ६ जना घाइते, ६ वटा घरमा पूर्ण क्षति भएको छ। 

त्यस्तै, बाढीपहिरोका कारणले हुम्लामा ३८ घरमा क्षति भएको र मुगुमा एउटा घरमा क्षति भएको कर्णाली प्रदेश प्रहरी कार्यालयले जनाएको छ। 

बाढी पहिरोका कारणले कर्णालीमा ३ करोड ६७ लाख ३९ हजार ७ सय ७१ रुपैयाँ बराबरको धनमालको क्षति भएको प्रदेश प्रहरी कार्यालयले जनाएको छ। 

बाढीपहिरोमा परेर सुर्खेतमा ४५ लाख ७ हजार, दैलेखमा १७ लाख ९५ हजार, जाजरकोटमा ३२ लाख २७ हजार, कालिकोटमा ५६ लाख ५९ हजार ७ सय ७०, रुकुमपश्चिममा २९ लाख १ हजार, हुम्लामा १८ लाख ९८ हजार र मुगुमा ७० हजार रुपैयाँ बराबरको धनसम्पत्ति क्षति भएको प्रवक्ता बास्तोलाले बताए ।