मंगलवार राति लेबननको राजधानी बेरुतमा दुईवटा विशाल विस्फोट हुँदा कम्तीमा ७८ जनाको मृत्यु भएको छ भने हजारौं मानिस घाइते भएका छन् । 

विस्फोटले निकै ठूलो क्षति पुगेको छ । बन्दरगाहमा भएको विस्फोटको असरले निकै टाढाका भवनहरू पनि भत्किएका छन् । आर्थिक पतनको संघारमा पुगेको लेबननलाई विस्फोटले थप आहत बनाएको छ । 

लेबननका प्रधानमन्त्री हसन दियाबले २७ सय टनको अम्मोनियम नाइट्रेट विस्फोट भएको बताए । उक्त पदार्थ रासायनिक मलमा उपयोग गरिन्छ र सुरुङ विस्फोट गराउन पनि प्रयोग हुन्छ । 

विस्फोटमा परी मारिएकाहरूको सम्झनामा प्रधानमन्त्री दियाबले राष्ट्रिय शोक दिवस घोषणा गरेका छन् । 

विस्फोट भएको गोदामका विषयमा सन् २०१४ देखि नै चेतावनी दिँदै आएको अधिकारीहरूले बताएका छन् । 

प्रधानमन्त्रीले गोदामका विषयमा तथ्य उजागर गर्ने बताए तर विस्तृत विवरण दिएनन् । 

कोरोनाभाइरस संकटका कारण भरिभराउ अस्पतालहरूमा विस्फोटका घाइते समेत थपिँदा खुट्टा राख्ने ठाउँ छैन । रक्तदान गर्न तथा विद्युत् प्रवाह कायम राख्न जेनेरेटर चलाउन पुकारा गरिएका छन् । 

अमेरिकाका राष्ट्रपति डोनल्ड ट्रम्पले बेरुतमा डरलाग्दो आक्रमण भएको हुन सक्ने बताए । तर यो आक्रमण नभएको लेबनानी अधिकारीहरूको भनाइ छ । 

लेबननको सुप्रिल डिफेन्स काउन्सिलले बेरुतलाई विपद्ग्रस्त शहर घोषणा गर्न, दुई हप्ताको स.कटकाल लगाउन तथा सुरक्षाको जिम्मेवारी सेनालाई सुम्पिन सिफारिश गरेको छ । 

टेलिभिजनबाट प्रसारित बयानमा राष्ट्रपति मिसेल आयोनले सन् २०२० को बजेटबाट १०० अर्ब लेबननी पाउन्ड छुट्ट्याएको बताइएको छ । 

विस्फोटका कारण सास फेर्न नै खतरनाक स्थिति रहेको भनी स्थानीयहरू त्रस्त छन् । बेरुतमा रहेको अमेरिकी दूतावासले मानिसहरूलाई मास्क लगाउन र घरैभित्र बस्न सल्लाह दिँदै बयान जारी गरेको छ । 

बेरुत विश्वविद्यालयको एयरोसोल रिसर्च ल्याबको इन्डिकेटरमा हावाको गुणस्तर बेलुका ७ बजेसम्म राम्रो भइसकेको जनायो । 

विभिन्न देशहरूले लेबननलाई सहायता सामग्री पठाउन थालेका छन् । 
 

A video I received on WhatsApp of the scalr of explosion in #Beirut, confirming it was at the port. pic.twitter.com/bIkcyfsi0o

— Bissan Fakih (@BissanCampaigns) August 4, 2020