कोरोना भाइरस संक्रमणको फैलावट जनचेतनाको अभावले मात्रै होइन, जान्नेसुन्ने मान्छेकै लापरवाहीले समेत फैलिएको पाइएको छ ।

गण्डकी प्रदेशको एक गाउँपालिकाका हाकिम सा’प प्रमुख प्रशासकीय अधिकृतको हेलचक्र्याइँले परिवारका ४ जना सदस्यले समेत कोरोना संक्रमणको शिकार हुनुपरेको छ ।

कोरोनाको आशंकामा अस्पतालमा स्वाब दिएर क्वारेन्टीनमा बस्नुपर्नेमा अधिकृत घर गए । घर गएपछि ती अधिकृतमा कोरोना पुष्टि भयो । त्यसपछि ‘कन्ट्याक्ट टे«सिङ’ गर्दा बिहीवार उनका बाबु, आमा र २ छोराहरूमा कोरोना संक्रमण पुष्टि भएको छ ।

गाउँपालिकाका ती अधिकृतले गत साउन १४ गते स्वाब दिएका थिए । पोखरामा भएको परीक्षणमा साउन १७ गते उनको रिपोर्ट पोजेटिभ आयो ।

काठमाडौंको गंगालाल राष्ट्रिय हृदय रोग उपचार केन्द्रमा उपचाररत बिरामी आफन्त भेटेर केही दिनअघि उनी गण्डकी प्रदेश फर्किएका थिए । काठमाडौंबाट आएपछि कार्यक्षेत्र फर्किएका उनले अस्पतालमा स्वाब दिए । स्वाब दिएपछि उनी पोखरास्थित घर आए । उनको रिपोर्टमा कोरोना देखिएपछि परिवारका सदस्य पनि आतंकित भए । 

कन्ट्याक्ट ट्रेसिङ गर्दा ४ दिनअघि परिवारका सदस्यहरूको पनि स्वाब संकलन गरियो । क्षयरोग उपचार केन्द्रमा भएको पीसीआर परीक्षणमा बिहीवार उनका ८२ वर्षीय बुवा, ७२ वर्षीया आमा, ७ र १४ वर्षीय छोराहरूको पनि रिपोर्ट पोजेटिभ आयो । पत्नीको भने रिपोर्ट नेगेटिभ आएको क्षेत्रीय स्वास्थ्य निर्देशनालय पोखरा जनाएको छ । 

स्वाब संकलनपछि क्वारेन्टीनमा बस्ने वा सुरक्षाका अन्य उपाय अपनाउनुको सट्टा घरकै परिवारको सम्पर्कमा आउनु राम्रो नभएको कास्कीका एक स्वास्थ्य अधिकृतले बताए । कोरोना संक्रमितहरूलाई आइसोलेसन लैजाने तयारी भएको जनाइएको छ ।