टाटा मोटर्सका व्यावसायिक गाडी बिक्रीवितरणका लागि सिप्रदी ट्रेडिङ प्रालिको आधिकारिक डिलर शशिला मोटर्स प्रालिले गाडी खरिदका लागि अनलाइन सुविधा दिने भएको छ ।

प्रालिले कोभिड–१९ का कारण विशेष सावधानी अपनाउनुपर्ने भएकाले घरमै बसेर आफूले खोजेको गाडी बुकिङ गर्न मिल्ने सुविधाको शुभारम्भ गरेको हो ।

यससँगै अब उपभोक्ताले टाटाका व्यावसायिक गाडीहरू सजिलै अनलाइनबाटै खरिद गर्न सक्नेछन् । प्रालिले www.shasheelamotors.com मार्फत नेपालमै पहिलो पटक यो सेवा शुरू गरेको हो । यसअघि केही कम्पनीले निजी कार अनलाइनबाट खरिदबिक्री गर्ने गरेको भए पनि व्यावसायिक गाडीमा यस्तो सुविधा थिएन ।

वेबसाइट शुभारम्भ गर्दै सिप्रदी ट्रेडिङ प्रालिका प्रमुख कार्यकारी अधिकृत राजनबाबु श्रेष्ठले अहिलेको परिस्थितिमा नयाँ गाडी खरिद गर्न तथा पुराना गाडी खरिदबिक्री गर्न यो भर्चुअल शोरूम नेपालको डिजिटल क्षेत्रमा कोशेढुंगा सावित हुने बताए ।

शशिला मोटर्सका प्रबन्ध निर्देशक सन्तोष खतिवडाले उपभोक्ताको आवश्यकता र सहजतालाई मध्यनजर गर्दै सेवालाई थप परिमार्जित गर्दै लैजाने बताए । अबको बजार भनेको डिजिटल मार्केट नै भएकाले यसलाई व्यापक र सर्वसुलभ बनाउँदै लैजानुको विकल्प नभएको उनको भनाइ छ ।

वेबसाइट भित्रको ‘भर्चुअल शोरुम’मार्फत उपभोक्ताले आफूलाई आवश्यक पर्ने जुनसुकै मोडलका नयाँ, पुराना गाडी सजिलै छान्न सक्नेछन् । यो सेवा अन्तर्गत टाटाका जुनसुकै मोडलका नयाँ व्यावसायिक गाडीहरू अनलाइनमै बुकिङ गरी खरिद गर्न सकिने छ । जसमा उपभोक्ताले नयाँ गाडी खरिदको सुविधाबाहेक पुराना गाडी समेत खरिद बिक्री गर्न पाउने छन् ।

आफूसँग भएका पुराना व्यावसायिक गाडी बिक्री गर्न चाहने बिक्रेताले गाडीबारे विस्तृत विवरण र फोटो सजिलै वेबसाइटमा अपलोड गर्न सक्नेछन् । ‘शशिला मोटर्सले आफ्नो सम्पर्कमा रहेका पुराना गाडी किन्न चाहने उपभोक्ता र बेच्न चाहने बिक्रेतावीच समन्वय गरिदिनेछ भने आफैंले पनि पुराना गाडी किन्नेछ । क्रेताले बिक्रेतासँग भएको गाडी प्रत्यक्ष हेर्न चाहेको अवस्थामा समेत कम्पनीले त्यसको व्यवस्था मिलाइदिनेछ । जसले गर्दा पुराना गाडी किन्न वा बेच्न चाहनेले अन्यत्र कतै भौतारिनुपर्ने छैन,’ प्रालिद्वारा प्रेषित विज्ञप्तिमा उल्लेख छ ।