अमेरिकाले दक्षिण चीन सागरमा चीनविरुद्ध दक्षिणपूर्वी एसियाका मुलुकहरूको साझेदारीको कोशिश गरेको भए पनि सफलता पाउन सकेको छैन । 

अमेरिकाका परराष्ट्रमन्त्री माइक पोम्पेओले चीनको आक्रामक दाबीविरुद्ध एकजुट हुन दक्षिणपूर्वी एसियाका मुलुकहरूलाई आह्वान गरेका भए पनि उनीहरूले वास्तै गरेनन् । 

दक्षिण चीन सागरमा रहेको विवादका विषयमा नीति वक्तव्य जारी गरेपछि अमेरिकाको परराष्ट्र मन्त्रालयले चीनविरुद्ध क्षेत्रीय समर्थन जुटाउने कोशिश गरेको थियो । 

चीनसँग स्थिर सम्बन्ध कायम गर्न खोजेका केही दक्षिणपूर्वी एसियाका मुलुकहरूले सार्वजनिक रूपमा पोम्पेओका भनाइबाट आफूलाई टाढै राखेका छन् । अन्य मुलुकले यसमा सामान्य प्रतिक्रिया दिएका छन् । कतिपय मुलुकमा चाहिँ अमेरिकाको कठोर अडानका विषयमा मतभेद छ । 

बेइजिङसँगको शीतयुद्धलाई चर्काउने हिसाबमा पोम्पेओले चीनको सामुद्रिक साम्राज्य बन्न नदिने तथा दक्षिणपूर्वी एसियामा रहेका साझेदारहरूको सामुद्रिक स्रोतमाथिको अधिकारलाई सुरक्षित राख्न सहयोग गर्ने बताएका छन् । 

चीनले समुद्रका विभिन्न स्थानमा गरेको दाबीलाई अमेरिकाले अस्वीकार गरेको मात्र नभई त्यसलाई अवैध समेत घोषणा गरेको छ । भियतनामले भानगार्ड बैंक, मलेसियाले जेम्स शोल, इन्डोनेसियाले नतुना बेसार, फिलिपिन्सले सेकेन्ड टमस शोल र मिस्चीफ रीफमाथि दाबी गरिरहेकोमा चीनले ती स्थान आफ्नो भएको बताउँदै आएको छ । 

तर क्षेत्रीय साझेदार र मित्रहरूबाट निरपेक्ष समर्थन हासिल गर्नुको साटो अमेरिकाले चीनविरुद्धको गठबन्धन बनाउनै सकेको छैन । 

हालैका हप्ताहरूमा चिनियाँ अधिकारीहरूले कोभिड–१९ को खोप बन्नेबित्तिकै दक्षिणपूर्वी एसियाका मुलुकमा पठाउने अनि विकास निर्माण परियोजनामा लगानी पनि गर्ने भन्दै दक्षिण चीन सागरमा अमेरिकी योजनालाई विफल बनाउन कोशिश गरिरहेका छन् । 

यसले गर्दा पनि दक्षिणपूर्वी एसियाका मुलुकहरू अमेरिकालाई चीनका विरुद्ध साथ दिने विषयमा उत्सुक देखिएका छैनन् । 

एसिया टाइम्सबाट