वरिष्ठ नेता रामचन्द्र पौडेल पक्षधरको विरोधका बावजुद नेपाली कांग्रेसका सभापति शेरबहादुर देउवाले पार्टीको विभाग गठन, नियुक्ति र मनोनयन गरेपछि नेपाली कांग्रेसभित्र फेरि विवाद बल्झिएको छ । देउवाइतर पक्षले विभाग गठन गर्ने सभापति देउवाको निर्णयप्रति आपत्ति जनाएको छ । 

कांग्रेस केन्द्रीय सदस्य डा. मीनेन्द्र रिजालले देउवाको भूमिका पार्टी सभापतिभन्दा पनि आगमी महाधिवेशनमा सभापतिको उम्मेदवारको सहयोगीको जस्तो भएको टिप्पणी गरे । 

‘विभाग गठनको एकतर्फी निर्णयले शेरबहादुर देउवा पार्टी सभापति भन्दा पनि सभापतिको उम्मेदवारको सहयोगीको रूपमा प्रकट हुनुभयो,’ रिजालले लोकान्तरसँग भने, ‘महाधिवेशनको मुखमा आएर भोलिको उम्मेदवारले आफूलाई अनुकूल हुनेगरी एउटा पक्षबाट मनोनयन गर्न मिल्छ ?’

देउवाको कार्यशैलीले सरकारको स्वेच्छचारी कदमको विरोध गर्ने नैतिक धरातल गुमेको रिजालले टिप्पणी गरे । 

‘राज्यका विभिन्न निकायमा एकतर्फी नियुक्ति गरेर सरकारले अधिनायकवादी चरित्र देखायो भनेर विरोध जनाउने नैतिक धरातल कांग्रेसले सभापतिको कार्यशैलीका कारण गुमाएको छ,’ रिजालले थपे । 

महाधिवेशन सम्पन्न भएको दुई वर्षभित्र गर्नुपर्ने विभागको गठन चारवर्षे कार्यकाल पूरा भएर थपिएको समयमा गरेपछि कांग्रेसभित्र विवाद शुरू भएको छ । 

देउवाले आइतवार संगठन विभागमा गोपालमान श्रेष्ठ, शिक्षा विभागमा हरिप्रसाद नेपाल, यातायात व्यवसायी समन्वय विभागमा महेन्द्र यादव, मुस्लिम विभागमा फरमुल्लाह मन्सुर, तराई–मधेश समन्वय विभागमा अजयकुमार चौरसिया, संघीय मामिला तथा प्रदेश समन्वय विभागमा रमेश रिजाल, वन वातावरण तथा विपद व्यवस्थापन विभागमा अम्बिका बस्नेत, वित्तीय तथा सहकारी संस्था समन्वय विभागमा आनन्दप्रसाद ढुंगाना, स्थानीय तह समन्वय विभागमा अर्जुनप्रसाद जोशी र निर्माण व्यवसायी समन्वय विभागमा वीरबहादुर बलायरलाई प्रमुखमा चयन गरेका थिए । 

केन्द्रीय सदस्य रिजालले देउवाको स्वेच्छाचारी कार्यशैलीको प्रतिवाद गर्ने र आफ्नो पक्षका सदस्यहरूलाई अवैधानिक विभागहरूमा सहभागी नहुन आग्रह गरिने बताए ।