ओलीको स्वास्थ्यबारे जसपाको विज्ञप्तिप्रति प्रधानमन्त्रीको सचिवालयको कडा आपत्ति

प्रधानमन्त्री केपी शर्मा ओलीको स्वास्थ्यलाई लिएर जनता समाजवादी पार्टी नेपाल (जसपा)ले हालै जारी गरेको विज्ञप्तिको एक अंशप्रति प्रधानमन्त्री ओलीको सचिवालयले आपत्ति प्रकट गरेको छ । 

प्रधानमन्त्रीका प्रेस सल्लाहकार सूर्य थापाले मंगलवार एक विज्ञप्ति प्रकाशित गरी ‘केपी ओली सरकारको कुनै ठोस कार्ययोजना नरहेको र प्रधानमन्त्री शारिरिक र मानसिक दृष्टिले अत्यन्तै कमजोर रहेको’ भन्ने टिप्पणी अशिष्ट, पूर्वाग्रही, अत्यन्त दुराशयपूर्ण र खेदजनक भएको बताएका हुन् । 


Advertisement

पटकपटक राज्यको जिम्मेवार तहमा रहिसकेका र प्रधानमन्त्रीको समेत जिम्मेवारी सम्हालिसकेका र आफूलाई सुशिक्षित भनेर चिनाउन रूचाउनेहरू संलग्न दलबाट यस स्तरको तरिका कुण्ठाग्रस्त गालीगलोज मात्र भएको विज्ञप्तिमा उल्लेख छ । 

‘राजनीतिमा विवाद, मतभेद र असहमतिहरू हुन्छन्, जसलाई स्वाभाविक नै मानिन्छ । त्यसै आधारमा यस स्तरको अपसंस्कारको प्रदर्शनबाट कहाँ पुगिन्छ ? सम्बन्धित व्यक्ति र पक्षहरूले नै हेक्का राख्नु श्रेयष्कर होला,’ थापाले भनेका छन्, ‘सिद्धान्त, नीति र कार्यक्रममा बहस गर्न नसक्ने निरूपाय व्यक्तिहरू नै आफ्नो स्वार्थका रोटी सेक्न नपाउँदा आँखा चिम्लेर अँध्यारो देख्छन् र उज्यालोको भर्त्सनामा जुट्छन् ।’


Advertisement

प्रधानमन्त्री ओलीलाई आलोचना, विरोध र गालीगलौजमा गरिएको सन्दर्भ कुनै नौलो नभएको सचिवालयको विज्ञप्तिमा उल्लेख छ । ‘आफ्नो निहीत स्वार्थ पूरा गर्न उहाँलाई बाधक देख्नेहरूले विगत छ दशकयता यसो गर्दै आएको तथ्य स्पष्ट नै छ । त्यस्ता तत्वहरू इतिहासको गर्तमा सीमित भइसकेका छन् । अरूबाट निर्देशित कदम, गलत नीति, विचार र व्यवहारले कोही कसैलाई सफलता हासिल हुँदैन भन्ने जगजाहेर छ,’ विज्ञप्तिमा भनिएको छ, ‘शीशाको घरमा बसेर ढुंगा हान्नेहरू आफैं असुरक्षित र पतन हुनु अनिवार्य छ । जागृति, चेतना, संस्कार र सदाचारका मानकहरू सम्बन्धित व्यक्तिअनुरूप नै व्यवहारमा अभ्यास गरिने र भिन्नाभिन्नै हुने यथार्थ हरेक समाजका सचेत व्यक्तिलाई अवगत नै रहिआएको छ ।’

यसअघि जसपाले २५ गते जारी गरेको विज्ञप्तिमा कोभिड नियन्त्रण गर्न सरकारसँग कुनै योजना नरहेको तथा प्रधानमन्त्री ओली शारीरिक र मानसिक रूपले अत्यन्त कमजोर रहेको आरोप लगाइएको थियो । 
 

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्