गोंगबु हत्याकाण्डको प्रमुख अभियुक्त पक्राउ परी सार्वजनिक भएपछि उक्त प्रकरणको पर्दा उघ्रिएको छ ।

प्रहरीले घटनामा संलग्न रहेको आशंकामा पक्राउ गरेको महिलाले अपराध स्वीकारेपछि शव पहिचान भएको भोलिपल्टै घटनाको यथार्थ बाहिर आएको हो ।

हत्यामा संलग्न कल्पना मुडभरी पौडेललाई महानगरीय प्रहरी परिसर काठमाडौंले मंगलवार पत्रकार सम्मेलन गरी सार्वजनिक गरेको हो ।

प्रहरीसँगको बयानमा मुडभरीले आफ्नो अपराध स्वीकारेकी छन् ।

नक्कली फेसबूक अकाउन्ट बनाएर निर्वस्त्र तस्वीरहरू पठाउने गरेकाले कोठामा बोलाएर हत्या गरेको बयान उनले दिएको महानगरीय प्रहरी परिसर काठमाडौंका प्रमुख एसएसपी श्यामलाल ज्ञवालीले पत्रकार सम्मेलनमा दिए ।

दहीचिउरामा स्लिपिङ ट्याबलेट राखेर खुवाएको र त्यसपछि अण्डकोषमा हानेर मारेको उनले बताएकी छन् ।

शव व्यवस्थापनमा भने छोरीले पनि सघाएको बयान उनले दिएको प्रहरीले जनाएको छ ।

गोंगबुमा टाउको र खुट्टविनाको शव सुटकेशमा भेटिएको थियो । सुटकेशमा शव नआटाएपछि टाउको र खुट्टा काटेको उनले बताएकी छन् ।

टाउको र खुट्टा भने जेब्रा झोलामा अर्कै स्थानमा भेटिएको थियो । शरीर भेटिएपछि टाउको भने प्रहरीको जोजो नामक कुकुरले पत्ता लगाएको थियो ।

शवको सनाखत हुन नसकेपछि प्रहरीले फोटो नै सार्वजनिक गरेको थियो ।  त्यसपछि शव दाङका कृष्णबहादुर बोहोराको भएको खुलेको थियो । 

सनाखत भएकै दिन प्रहरीले मुडभरीलाई पक्राउ गरेको थियो ।

अनुसन्धानबाट खुलेका तथ्यहरू :

– मिति २०७७।०४।२५ गते बिहान अन्दाजी ०७:०० बजेको समयमा टोखा न.पा. वडा नं. १० नवज्योति मार्गमा रातो प्लास्टिकले बेरेको, बोराको नाम्लोसहित कालो रंगको सुटकेशभित्र टाउको र खुट्टाविनाको पुरुषको शव फेला परेको ।
– तत्काल तालिम प्राप्त जोजो नामको ट्र्याकिङ डग (कुकुर) परिचालन गर्दा टाउको र खुट्टा पोको पारी फालेको अवस्थामा अन्दाजी ३०० मिटर पूर्व उत्तरमा रहेको स्वर्गद्वारी मार्गको खाली जमिनको कुनामा फेला परेको ।
– मृतक पहिचानका लागि मिति २०७७।०४।२६ गते मृतकको फोटो सामाजिक सञ्जाल तथा मिडियामार्फत सार्वजनिक गरिएको ।
– मिति २०७७।०४।२६ गते मृतकको मामा नाता पर्ने व्यक्ति आई मृतकको सनाखत गरेको ।
– मृतक जिल्ला रोल्पा रून्तीगढी गाउँपालिका वडा नं. ७ घर भई हाल गोंगबुस्थित एक होटलमा बस्दै आएका वर्ष ४५ का कृष्णबहादुर बोहोरा भन्ने यकिन भएको ।
– निज मृतक विगत ८ महिनादेखि उक्त होटलमा बस्दै आएको ।
– मृतक र अभियुक्तबीच करीब ३/४ वर्षदेखि फेसबूकमार्फत चिनाजानी भई सम्पर्कमा रहेको ।
– मृतक कृष्णबहादुर बोहोरा अभियुक्तको कोठामा बेलाबेलामा आई भेट्ने गरेको ।
– मृतकले अभियुक्तको फोटो राखी फेक फेसबूक आई.डी. खोली चलाउने गरेको भन्ने बुझिएको र आफू अनुकूल चल्नका लागि दबाब दिने गरेको ।
– मृतक घटनाको दिन आफू बसेको होटलबाट बा ७२ प ५६४४ नं. को स्कुटी प्रयोग गरी अभियुक्तको कोठामा आएको ।
– मृतकलाई अभियुक्तले दही, चिउरा, मासु र भोड्का खान दिएको ।
– शवको बाँकी भाग कालो रंगको सुटकेशमा राखी पश्चिम बाटोको छेउमा फाली कोठामा फर्की आई बसेको ।
– मिति २०७७।०४।२५ गते बेलुकी बिरामी लिएर काठमाडौं आई फर्कन लागेको चिनेजानेको एम्बुलेन्स ड्राइभरलाई फोन गरी भाडा तिरी सोही एम्बुलेन्सबाट चितवनतर्फ गएको ।
– अनुसन्धानका क्रममा निज कल्पना मुडभरी (पौडेल) घटनामा संलग्न भएको र निजको छोरी शव व्यवस्थापनमा संलग्न रहेको खुल्न आएकाले पक्राउका लागि प्रहरी परिचालन भएको ।
– निजहरूलाई खोजतलासका क्रममा जिल्ला प्रहरी चितवनको समन्वयमा पक्राउ गरिएको ।
– हालसम्मको प्रारम्भिक अनुसन्धानमा क्राइम सीन तथा भिक्टिम र शंकास्पद् व्यकतिको बीचमा टेक्निकल र फिजिकल सम्बन्ध स्थापना भएको तथा थप अनुसन्धान कार्य भइरहेको ।  

घटनास्थलबाट बरामद भएका दशी/प्रमाणका सामानहरू :

– घटनामा प्रयोग भएको धारिलो हतियार 
– हिर्काउन प्रयोग भएको ह्याम्मर
– रगत लतपतिएको पञ्जा, म्याट्रेसको टुक्रा
– घाँटी कस्न प्रयोग गरेको कालो रंगको सल
– सुटकेशको ह्याण्डल, नाम्लोमा प्रयोग भएको डोरीको टुक्रा
– मृतकले लगाएका तथा झोलामा रहेका मृतकका कपडाहरू
– स्लिपिङ ट्याबलेटको खोल
– मोबाइल सेटहरू

​​अभियुक्तको विवरण :

(१) नाम/थर : कल्पना मुडभरी (पौडेल)  

वतन : जिल्ला– चितवन, कालिका न.पा. वडा नं. ७ घर भई हाल का.जि. टोखा नगरपालिका वडा  नं. १० नवज्योति मार्ग बस्ने ।
उमेर : ३७ वर्ष
पेशा : गृहिणी/अभिनय (केही टेलीशृंखलामा)
पक्राउ मिति : २०७७।०४।२६ गते ।
पक्राउ स्थान : जिल्ला– चितवन, कालिका न.पा. वडा नं. ९ शक्तिखोरस्थित माइती ।