जाजरकोटको भेरी नगरपालिका–४ रानागाउँका यादव विकलाई दल्लीमा आफन्त पुर्‍याउन जाँदा बाँके खोलामा १ हजार रुपैयाँ तिर्नुपर्‍यो ।

खोलामा एक्लै मोटरसाइकल लैजान नसक्दा उनले १ हजार दिएर खोला तारेर दल्ली गएको बताए । फेरि फर्कंदा सोही बाटोमा थप १ हजार रुपैयाँ तिर्नुपरेको पीडा यादवले सुनाए ।

पैंतीस किलोमिटर सडकमा अहिले जीपमा जाँदा पनि १ हजार रुपैयाँ भाडा लाग्ने गर्दछ । वर्षायाममा बाटो ठाउँठाउँमा भत्किएको भन्दै ४०० रुपैयाँमा जान सकिने ठाउँमा अहिले १ हजार भाडा लिन थालिएको छ ।

बाँके खोला सानो हुँदा रुकुमपश्चिम आठबीसकोट नगरपालिकाको सिमबजार र नलगाड नगरपालिकाको कालीमाटीमा सिधा यातायात सेवा हुने गर्छ । 

खोला बढ्ने बित्तिकै बाँके खोलाको २ किनारामा जीपहरू राखिएको हुन्छ । सोही २ किनारका काठको फलेकको सहयोगमा खोला पार गरी पारि रहेको अर्को जीपमा बसेर यात्रा गर्नुपर्ने बाध्यता रहेको नलगाड नगरपालिका–८ का विष्णुकुमारी खत्रीले जानकारी दिइन् ।

बर्सेनि यो ठाउँमा खोलाले दुःख दिने गरेको छ । सोमवार मात्र सोही खोलामा मालवाहक ट्रक फस्दा यातायात सेवा ठप्प भएको थियो । 

जाजरकोट–डोल्पा सडकखण्डको बीचबीचमा १२ खोला छन् । कुनै पनि खोलामा पुल निर्माण भएको छैन । पुल निर्माण नहुँदा तिनै खोलालाई देखाएर यातायात व्यवसायीले चर्को मूल्य असुल्ने गरेका छन् । मोटरसाइकल तार्न प्रतिखोला १ हजार रुपैयाँ तिरेर खोला तारेर जानु पर्ने बाध्यता रहेको छ ।

खोलामा पानीको बहाव बढेसँगै यस सडकमा चल्ने खच्चडहरू समेत ठप्प हुने गरेका छन् । ज्यानको बाजी लगाएर खोला तार्दा धेरै पटक घाइते हुनुपरेको खच्चड व्यवसायी मानबहादुर विकले बताए । स्थानीय कमल पुनले भने, ‘यो खोलामा आफूले थाहा पाउँदासम्म ७ जनाको बगेर मृत्यु भइसक्यो । अझै कतिले ज्यान गुमाउने हुन् थाहा छैन ।’ 

बाँके खोलामा पुल निर्माण शुरु भए पनि पूरा नहुँदा सर्वसाधारणले दुःख पाउँदै आएका छन् । रुकुमपश्चिम, जाजरकोट र डोल्पाका सर्वसाधारण यही खोला तरेर यात्रा गर्छन् । वर्षायाममा खोलाको डर र हिउँदमा धुलाम्य सडकमा यात्रा गर्दा मान्छे नचिनिने अवस्था सिर्जना हुँदै आएको सर्वसाधारणको भनाइ छ । १५ वर्षसम्म सडकको स्तरोन्नति नहुँदा यात्रुले पीडा भोग्नु परेको हो । 

जाजरकोट–डोल्पा सडकखण्डमा यात्राभन्दा सास्ती बढी भोग्नु परेको छ । नलगाड नदी र धुर्मेखोलामा पुल निर्माण नहुँदा दल्लीबाट तल्लु बगरसम्म अर्को जीप चढेर यात्रा गर्नुपर्ने बाध्यता छ । नलगाड नदी सानो हुँदा काठको फलेकबाट तरेर जाने यातायातका साधनहरू नदीमा पानीको बहाव बढेसँगै ठप्प भएका छन् । 

धुर्मेखोलामा पानीको बहाव बढेसँगै सो ठाउँमा पनि जीपहरू तार्न नसकिएको चालक भीमबहादुर बुढाले बताए । त्यति मात्र होइन, खलंगा–पाँचकटिया सडकखण्ड समेत अवरुद्ध भएको छ । यो सडकखण्डको गाराराङ्सीमा पहिरोले सडक अवरुद्ध भएपछि १ महिनादेखि सडक अवरुद्ध भएको हो । अवरुद्ध सडक खुलाउने विषयमा सरोकारवाला निकायले चासो दिएको छैन । कालीमाटी–बारेकोट गाउँपालिकाको प्रशासकीय केन्द्रसम्मको सडक भौतिक पूर्वाधार कार्यालयले मर्मतको काम शुरू गरेको छ । – हेमन्त केसी/रासस