खलंगा–खार–देथला सडकखण्ड दुईतर्फी अवरुद्ध

प्रतिकात्मक तस्वीर

दार्चुलाको खार–खलंगा–देथला सडक ३ हप्तादेखि अवरुद्ध छ ।

खलंगा–खार–देथला सडकखण्ड र गोकुलेश्वर–देथला हुँदै खार–खलंगा जोड्ने सडक बाढी र पहिरोका कारण ठाउँठाउँमा अवरुद्ध भएको हो ।


Advertisement

दुवैतर्फ सडक अवरुद्ध हुँदा नौगाड गाउँपालिकाका स्थानीयलाई आवतजावतमा समस्या भएको छ । 

साउन ५ गते आएको बाढी पहिरोका कारण खार–खलंगा–देथला सडक अवरुद्ध भएको हो । सडकमा ग्राभेल गर्ने बेला बाढी पहिरोले अवरुद्ध गरेसँगै निर्माणको कार्य पनि ठप्प छ । प्रदेशको भौतिक पूर्वाधार कार्यालयअन्तर्गगत पूर्वाधार विकास कार्यालय बैतडीले यो सडक हेर्ने गर्छ । 


Advertisement

सडकको दुवैतर्फ कालोपत्रे र ग्राभेलका लागि गत आर्थिक वर्षको अन्तिममा ठेक्का सम्झौता भएको थियो । ठेक्का सम्झौतापछि ठेकेदार परिचालन हुने बित्तिकै बाढी पहिरो आएपछि यो सडकखण्ड ३ हप्तादेखि अवरुद्ध छ ।

अवरुद्ध सडकखण्ड खुलाउने प्रयास नहुँदा नौगाडका स्थानीयलाई आवतजावत र खाद्यान्न ढुवानी गर्न समस्या भएको छ । 

खलंगा–खार सडकखण्डको मालभेला, डुङुरी, काटै लगायतका आधा दर्जन ठाउँमा सडक अवरुद्ध भएको पूर्वाधार विकास कार्यालय बैतडीका सवइन्जिनीयर दीपेन्द्र धानुकले बताए । ‘अवरुद्ध सडकको सर्वेक्षण गरेका छौं,’ उनले भने, ‘छिट्टै बाटो खुलाउने प्रयास हुन्छ । सडक पूर्णरूपमा सञ्चालन गर्न भने केही समय लाग्छ ।’
 
उनका अनुसार भत्किएको सडकखण्डको मूल्यांकन भइसकेको छ । ‘कार्यालयमा पेश गर्ने तयारी छ । कुनै ठाउँमा पर्खाल लगाउनुपर्ने र थप ब्याक कटिङ गर्नुपर्ने अवस्था देखिन्छ ।’ धेरै ठाउँमा पर्खाल लगाएर पनि बाटो सञ्चालन गर्नुपर्ने अवस्था देखिएको धानुकले बताए ।

काटैभन्दा माथिल्लो क्षेत्रमा सडकमा कम क्षति पुगेको छ । खलंगा–खार सडकखण्डको झण्डै ९ किलोमिटर क्षेत्रमा ठेक्का सम्झौता भएर काम शुरू भएको अवस्थामा अवरुद्ध भएको हो । यो सडकखण्डमा ग्वालेक निर्माण सेवाले १८ करोड रुपैयाँमा कालोपत्रको ठेक्का पाएको छ ।

कमेन्ट गर्नुहोस्