चितुवाको छालासहित ७ जना पक्राउ

महानगरीय प्रहरी परिसर भक्तपुर र महानगरीय प्रहरी अपराध महाशाखाको संयुक्त अनुसन्धान टोलीले भक्तपुरबाट जंगली जनावर चितुवाको छालासहित ७ जनालाई पक्राउ गरेको छ ।

चाँगुनारायण नगरपालिका सुडालबाट ४ र सूर्यविनायकको दार्जलिङ हाइटबाट ३ गरी ७ जनालाई प्रहरीले मंगलवार साँझ पक्राउ गरेको महानगरीय प्रहरी परिसर भक्तपुरका प्रहरी नायब उपरीक्षक दीपक गिरीले जानकारी दिए ।


Advertisement

उनका अनुसार चाँगुनारायण–८ सुडालस्थित सुरेश कार्कीको घरमा प्रहरीले छापा मार्दा कोठा भाडामा लिई बसेका ४ जनालाई कालोमा खैरो र सेतो रङको पाटे चितुवाको सुक्खा छाला १ थान र चोरीकोे मोटरसाइकलसहित पक्राउ गरेको हो । उनीहरूकै बयानअनुसार यसमा संलग्न थप ३ जना सूर्यविनायक–८ दार्जलिङ हाइटबाट पक्राउ परेका हुन् ।

पक्राउ पर्नेमा रामेछाप सुनापति गाउँपालिका–५ स्थायी घर भई हाल चाँगुनारायण–८ सुडाल बस्ने १९ वर्षीय कुमार लामा, १७ वर्षीय फुसाङ तामाङ, १८ वर्षीय हिमाल लामा, २१ वर्षीय पासाङ तामाङ रहेका छन् । पक्राउ पर्नेमा काभ्रेपलाञ्चोक तिमाल गाउँपालिकाका–९ घर भई हाल सूर्यविनायक नगरपालिका–८ दार्जलिङ हाइट बस्ने २२ वर्षीय सञ्जीव सिंजाली मगर, रोशी गापा–१० घर भई सूर्यविनायक बस्ने २४ वर्षीय दिपेश तामाङ र सोही ठाउँका २३ वर्षीय मिलन मगर रहेका छन् ।


Advertisement

प्रहरीले उनीहरूको साथबाट भक्तपुर नगरपालिका–९ का प्रजु सुवालको चोरी भएको बा९०प ६५१० नम्बरको मोटरसाइकल बरामद गरेको छ । विभिन्न कम्पनीका मोबाइल ९ थान, सवारी चालक अनुमतिपत्र २ थान, विभिन्न मोटरसाइकलको नम्बर प्लेट ४ थान, मोटरसाइकलको लक १ थान बरामद गरेको छ ।  

चितुवाको छालाको गैरकानूनी कारोबारमा संलग्न भएको अभियोगमा पक्राउ परेका ७ जनालाई हिरासतमा राखी अनुसन्धान गरिरहेको जानकारी दिँदै परिसरका प्रवक्ता एवं प्रहरी नायब उपरीक्षक गिरीले थप अनुसन्धानका लागि चितुवाको छालासहित जिल्ला वन कार्यालयको जिम्मा लगाइने जानकारी दिए ।

कमेन्ट गर्नुहोस्