इराकले मन्त्री स्तरको भ्रमण रद्द गर्दै बुधवार टर्कीका राजदूतलाई बोलाएको छ । इराकका दुई शीर्ष सैन्य अधिकारीको मृत्यु हुने गरी भएको ड्रोन आक्रमणका लागि टर्की दोषी रहेको इराकको आरोप छ । 

इराकी अधिकारीहरूले उत्तरी इराकमा टर्कीबाट ठाडो आक्रमण भएको बताए । कुर्दिश क्षेत्रमा उक्त आक्रमण गरिएको हो । टर्कीले त्यहाँ ‘आतंकवादी’ हरूलाई हप्तौैंदेखि आक्रमण गरिरहेको छ । 

मंगलवार दुईजना बोर्डर गार्डका बटालियन कमान्डरहरू र उनीहरू चढेको गाडीका चालक मारिएको इराकी सेनाले बयान जारी गरेर बतायो । टर्कीले कुर्दिस्तान वर्कर्स पार्टीका विद्रोहीहरूका विरुद्ध जुन महिनाको मध्यबाट शुरू गरेको सीमापार कारवाहीमा इराकी फौजका सदस्य मारिएको यो पहिलो घटना हो । 

इराकको परराष्ट्र मन्त्रालयले टर्कीका राजदूतलाई दुईपटक बोलाएर आफ्नो भूमिमा भएको आक्रमणको विषयमा स्पष्टीकरण लिइसकेको छ । पछिल्लोपटक कडा शब्दमा विरोधपत्र लेखेको मन्त्रालयले जनाएको छ । 

टर्कीका रक्षामन्त्रीलाई बिहीवार स्वागत नगरिने पनि उसले जनाएको छ । 
 

एर्बिल प्रान्तको उत्तरतिर रहेको सिदाकानका मेयर इहसान चलाबीले प्रादोस्त क्षेत्रमा भएको ड्रोन आक्रमणले इराकी बोर्डर गार्ड कमान्डरलाई तारो बनाएको र त्यतिखेर उनीहरू कुर्दिश समूह पीकेकेसँग छलफलमा रहेको बताए । 

इराकको राष्ट्रपति कार्यालयले यो घटना इराकको सार्वभौमसत्ताको खतरनाक उल्लंघन भएको भनी निन्दा गरे र अंकारालाई यस क्षेत्रमा सबै सैन्य कारवाही रोक्न आह्वान गरे । 

मंगलवार इराकको राष्ट्रपतिका प्रवक्ताले यस्ता आक्रमण तत्काल रोक्न र दुवै पक्षलाई सीमा समस्या सुल्झाउन आग्रह गरे ।