सत्तारुढ नेपाल कम्युनिस्ट पार्टी (नेकपा)मा पछिल्लो समय देखिएको संवादहीनता तोडिएको छ ।

९ दिन लामो संवादहीनता तोड्दै अध्यक्ष पुष्पकमल दाहाल ‘प्रचण्ड’ नेकपाका अर्का अध्यक्ष एवं प्रधानमन्त्री केपी शर्मा ओलीलाई भेट्न बिहीवार बालुवाटार पुगे । 

प्रेस संयोजक विष्णु सापकोटा जुगलका अनुसार प्रचण्ड बिहान ११ बजेपछि बालुवाटार पुगेका हुन् । 

नेकपाका दुई अध्यक्षबीच साउन २० गते मंगलवारयता भेटवार्ता भएको थिएन । 

प्रधानमन्त्री ओलीले ५ दिनमा नेकपामा सहमति जुट्ने संकेत हिजो एक टेलिभिजन अन्तर्वार्तामा गरेका थिए । 

‘हप्ता दश दिन होइन हप्ता भन्दा यतै १० दिनको आधा पाँच दिनमा फेरि मसँग प्रश्न गर्नुस्, के हुन्छ सिनारियो । भोलि (बिहीवार) १ भनेर गन्न शुरू गर्नु होला,’ ओलीले अन्तर्वार्तामा भनेका थिए ।

ओलीको भनाइलगत्तै भएको भेटवार्तालाई निकै अथपूर्ण रूपमा हेरिएको छ । 

अध्यक्षद्वयबीच सहमति जुट्न नसक्दा असार १० गते शुरू भएको नेकपा स्थायी कमिटी बैठक अलपत्र पर्दै आएको छ ।

साउन ६ गते केही समयका लागि बसेको बैठक त्यसपछि अनिश्चितकालका लागि स्थगित भएको छ । 

केन्द्रीय कमिटी विघटन गरेर महाधिवेशन आयोजक समिति गठन गर्ने विकल्पमा समेत छलफल शुरू भएको नेकपा स्रोतले बतायो । 

महाधिवेशन आयोजक कमिटी बनाएर चैत्र अन्तिम साता महाधिवेशनमा जाने विकल्पमा पनि छलफल भइरहेको स्रोतको दाबी छ ।

अध्यक्षद्वयबीच छलफल नभएपनि नेकपा विवाद मिलाउन महासचिव विष्णु पौडेल लगायतका नेताहरूले भित्रभित्रै प्रयास गरिरहेका थिए ।