फूटबल जगतका सुपरस्टार क्रिस्टियानो रोनाल्डोलाई बार्सिलोना आउने अफर दिइएको स्पेनी फूटबल विज्ञ गिलेम बालागले बताएका छन् । 

रोनाल्डोले यस सीजनमा युभेन्टसलाई सेरी ए उपाधि जिताएका छन् । 

तर युभेन्टसलाई च्याम्पियन्स लीगको ट्रफी उचाल्ने इच्छा तीव्र रहेकाले रोनाल्डोलाई सन् २०१८ मा भित्र्याएको थियो । लगातार दुई सीजन रोनाल्डो हुँदा पनि युभेन्टस च्याम्पियन्स लीगमा प्रिक्वार्टरफाइनलबाटै बाहिरिएको छ । यसले गर्दा रोनाल्डो आफैं निराश भएका छन् । 

युभेन्टस च्याम्पियन्स लीगबाट बाहिरिएपछि प्रशिक्षक माउरिजियो सार्रीलाई बर्खास्त गरिएको छ र उनको स्थानमा आन्द्रिया पिर्लोलाई ल्याइएको छ । 

तर युभेन्टसले रोनाल्डोलाई बेच्न खोजिरहेको खबर पनि आइरहेका छन् । 

फ्रान्सेली सञ्चारमाध्यमहरूले रोनाल्डो पेरिस सेन्ट–जर्मान आउन चाहेको खबर दिइरहेका छन् ।

तर फूटबलविज्ञ बालागका अनुसार, रोनाल्डाका एजेन्ट होर्खे मेन्डेसलाई नयाँ क्लब खोज्न निर्देशन दिइएको छ । त्यसक्रममा उनले बार्सिलोनालाई पनि भेटेका छन् । 

रोनाल्डोलाई बार्सिलोनाले भित्र्याएमा लियोनल मेस्सीसँग खेल्नेछन् । लामो समयसम्म एकअर्काविरुद्ध प्रतिस्पर्धा गरेका यी दुई खेलाडीले करीयरमा पहिलोपटक सँगै खेल्ने परिस्थिति निर्माण हुँदा प्रशंसकहरू खुशी हुने पक्का छ । 

‘क्रिस्टियानो रोनाल्डोलाई पीएसजीसँग जोड्नु भनेको पीएसजीले उनलाई किन्न खोजेको भन्ने हैन । होर्खे मेन्डेसलाई रोनाल्डोका लागि नयाँ क्लब खोज्नू भनी निर्देशन आएकाले खबरहरू आएका हुन्,’ बालागले बीबीसी रेडियो ५ लाइभमा बताए । 

‘विगत ६ महिनादेखि उनलाई रियाल मड्रिडसँग जोडिएको थियो । उनीहरूले चाहिँ स्पष्ट रूपमा रोनाल्डोलाई फिर्ता लिँदैनौँ भने । रोनाल्डोलाई महंगो पारिश्रमिक तिर्नुपरेकाले युभेन्टस उनलाई छिटो बेच्न चाहन्छ । त्यसैले अमेरिकाको एमएलएस टीमसँग पनि कुरा चलिरहेको छ ।’

‘परिस्थिति यति गम्भीर बनिसकेको छ कि उनलाई बार्सिलोनामा समेत अफर गरिएको छ । तर उनलाई महंगो पैसा तिरेर किन्न जुनसुकै क्लब पनि हिच्किचाउँछ ।’

एक्सप्रेस डट् को डट् युकेबाट