बेलारुसमा प्रहरीले गरेको ज्यादती नजिकैबाट देखेपछि जनता स्तब्ध भएका छन् । 
 

विरोधकर्ताहरूसँग सडकमा भएको भिडन्तमा अनि हिरासत केन्द्रहरूमा गरिएको क्रूरताले बेलारुसीहरूलाई स्तब्ध बनाएको छ । 

आइतवार प्रहरीले पक्राउ गरेका एक व्यक्तिको हिरासतमै निधन भएको छ । उनकी आमाका अनुसार, उनलाई प्रहरीको गाडीमा घन्टौंसम्म राखिएको थियो । 

राजधानी मिन्स्कमा प्रहरी र प्रदर्शनकारीहरूबीच व्यापक भिडन्त भएको छ । 

प्रहरीले स्टन ग्रिनेड प्रहार गरेको छ र लट्ठीले प्रदर्शनकारीहरूलाई हिर्काएको छ । मानिसहरू चिच्याएको चर्को आवाजका कारण ग्रिनेडको आवाज दबेको छ । 
 

बेलारुसमा अभूतपूर्व विरोध प्रदर्शन भइरहेको देखिन्छ । अनेकौं शहर, नगर र गाउँका मानिसहरू जागेर विपक्षी दलकी नेत्री स्वेत्लाना तिखानोभ्स्कायालाई आइतवार भएको राष्ट्रपति निर्वाचनको विजेता घोषणा गराउन माग गरेका छन् । 

लगभग सात हजारजनालाई पक्राउ गरिएको छ । विरोध नगर्नेहरू पनि पक्राउ परेका छन् । दक्षिणी बेलारुसमा रहेको गोमेलमा मारिएका अलेक्जेन्डर भिखोर विरोध प्रदर्शनमा भाग लिन गएको नभई प्रेमिकालाई भेट्न गएको उनकी आमा बताउँछिन् । 

गृह मन्त्रालय चाहिँ प्रहरीले अपनाएको सुरक्षा उपाय उपयुक्त रहेको र १०० भन्दा बढी प्रहरी घाइते भएको बताउँछ । गाडीचालकहरूले ट्राफिक प्रहरीमागि गाडी चलाउन खोजेको र प्रहरीले उनीहरूलाई रोक्न हतियार प्रयोग गरेको उसको कथन छ । 

जनताहरू राष्ट्रपति अलेक्जेन्डर लुकाशेन्कोविरुद्ध आक्रोशित छन् । प्रहरी तथा अधिकारीहरूसँग पनि उनीहरू रिसाएका छन् ।
 

लुकाशेन्को टीभीमा बोल्दा मानिसहरूले हेरेर हाँस्ने गरेका छन् । 

उनले अधिकांश विरोधकर्ताहरू बेरोजगार वा आपराधिक विगत भएका मानिस भनी चित्रित गरेका छन् । उनीहरूका लागि जागिर खोज्न उनले सरकारलाई निर्देशन दिएका छन् । 

प्रहरीले मानिसको घरभित्र पस्दै भेटे जति सबैलाई समात्ने गरेको छ । विरोधमा भाग नलिएका किशोरहरूलाई पनि पक्राउ गरिएको छ । यसले गर्दा मानिसहरू थप आक्रोशित बनेका छन् । 
 

बेलारुसीहरू आआफ्नो बाल्कोनीबाट चिच्याउँदै प्रहरीलाई अन्तै जान भनिरहेका छन् । प्रहरीले बाल्कोनीतर्फ रबरको गोली प्रहार गर्ने गरेको छ । 

बीबीसीबाट