लामो समयदेखि संकट झेलिरहेको सत्तारूढ दल नेपाल कम्युनिस्ट पार्टी (नेकपा)भित्र कार्यदल गठनसँगै सहमतिको सम्भावना बढेर गएको छ ।

शुक्रवार प्रधानमन्त्रीसमेत रहेका अध्यक्ष केपी शर्मा ओली र अर्का अध्यक्ष पुष्पकमल दाहाल 'प्रचण्ड'बीच भएको छलफलमा कार्यदल गठनका विषयमा सहमति भएको थियो ।

कार्यदलमा ओलीका तर्फबाट महासचिवसमेत रहेका विष्णु पौडेल र प्रदेश ५ का मुख्यमन्त्री शंकर पोखरेल छन् ।

त्यस्तै अध्यक्ष प्रचण्डका तर्फबाट जनार्दन शर्मा र पम्फा भुसाल रहेका छन् भने वरिष्ठ नेता माधवकुमार नेपालका तर्फबाट भीम रावल र सुरेन्द्र पाण्डे रहेका छन् ।

पार्टीभित्र आफूलाई कर्नरमा पारिएको भन्दै निरन्तर गुनासो गर्ने गरेका वरिष्ठ नेता नेपालका तर्फबाट पनि कार्यदलमा बराबरी सहभागिता रहेको छ ।

अध्यक्षद्वय ओली र प्रचण्डबीच लामो समयपछि बिहीवारबाट संवादहीनता तोडिएको थियो ।

यससँगै महिनौं लामो विवाद हल हुने दिशातर्फ अघि बढेको छ । कार्यदललाई केही दिनमा सहमतिको खाका ल्याउने म्यान्डेट दिइएको छ ।

'आजको विकसित घटनाले नेकपाको विवाद समाधानतर्फ फर्केको स्पष्ट संकेत गरेको छ,' उच्च स्रोतले लोकान्तरसँग भन्यो, 'दुई अध्यक्ष सहमतिका साथ अघि बढ्न राजी हुनु र कार्यदल समेत गठन हुनुले अब नेकपाको विवाद हल हुने दिशातिर अघि बढ्यो भन्ने बुझ्न सकिन्छ ।'

स्रोतका अनुसार आजको बैठकमा दुवै अध्यक्ष पार्टी एकतालाई थप मजबुत बनाएर अघि लैजान सहमत भएका छन् ।

यसअघि प्रधानमन्त्री ओलीले बुधवार एक टेलिभिजन अन्तर्वार्ताका क्रममा नेकपा विवाद ५ दिनभित्र समाधान हुने संकेत गरेका थिए ।

​असार १० गते शुरू भएको स्थायी कमिटी बैठक विवादका कारण पटक–पटक अवरुद्ध हुँदै आएको छ ।