उच्च शिक्षाका लागि विदेशी विश्वविद्यालयमा अध्ययन गर्न चाहने विद्यार्थीलाई वैदेशिक अध्ययन अनुमतिपत्र (नो अब्जेक्सज सर्टिफिकेट) जारीको कार्य पुनः सञ्चालन हुने भएको छ ।

मन्त्रिपरिषद्को भदौ ९ गतेको बैठकले सो निर्णय गरेको सरकारका प्रवक्ता डा. युवराज खतिवडाले बिहीवार आयोजित पत्रकार सम्मेलनमा जानकारी दिए ।

कोरोना महामारीको जोखिमका कारण सरकारले गत चैत ३ गते अनुमति दिने कार्य स्थगनको निर्णय गरेको थियो । 

जोखिम कायमै रहेतापनि स्वास्थ्य सुरक्षाका मापदण्ड अपनाइ भदौ १६ गतेदेखि अन्तर्राष्ट्रिय उडान खोल्ने तयारी भएपछि वैदेशिक अध्ययन अनुमतिपत्र पनि खुल्ने भएको हो । शिक्षा, विज्ञान तथा प्रविधि मन्त्रालयले त्यस्तो अनुमति जारी गर्दै आएको छ ।