धनुषामा प्रहरी प्रशासन तथा तस्करहरूको मिलेमतोमै व्यापक अवैध तस्करी भईरहेको समाचार प्रकाशन भए पछि धनुषा प्रहरी एक्सनमा आएको छ । नेपाल र भारत बीचको खुल्ला सीमा नाका वरिपरि थप प्रहरी सक्रिय भएका छन भने धमाधम अवैध तस्करीका सामानहरु समेत पक्राउ गरेर जनकपुर भन्सार कार्यालयलाई बुझाउन थालेका छन् । 

जिल्ला प्रहरी कार्यालय धनुषाका प्रवक्ता समेत रहेका प्रहरी नायब उपरीक्षक मकेन्द्र मिश्रका अनुसार पछिल्लो सातामा धमाधम अवैध तस्करीका सामानहरु पक्राउ गरिएको छ ।  भदौ १८ गते जिल्ला प्रहरी कार्यालय धनुषाबाट सादा पोसाकमा खटिएको प्रहरी टोलीले नगराईन नगरपालिका वडा नम्बर ९ स्थित नेपालबाट अवैध रुपमा भन्सार छली भारत तर्फ लैजाँदै गरेको अवस्थामा हरियो मटर २१ बोरा, सोफी नामक मदिरा ५४ कार्टुन र ४ थान मोटरसाइकल सहित अन्दाजी २ लाख ६३ हजार रुपैयाँ बराबरको सामान पक्राउ गरिएको थियो । ती सामानहरु सहित ४ जना तस्करलाई समेत पक्राउ गरिएको छ । 

त्यसै गरी धनुषाको बिदेह नगरपालिकाको वडा नम्बर १ महिनाथपुर स्थित दशगजा क्षेत्र बाट २ लाख ५० हजार रुपैयाँ बराबरको बेवारिसे अबस्थामा रहेको सामान बरामद गरिएको मिश्रले बताए । कपडा, चीनी, यूरिया मल, मदिरा, भांग, खाने तेल सहितको सामान पक्राउ गरि भन्सार दाखिला गराइएको छ ।

त्यसै गरी भदौ १९ गते बिदेह नगरपालिका वडा नम्बर ९ स्थित इटहरवामा समेत इलाका प्रहरी कार्यालय औरही र प्रहरी चौकी इटहरवाको संयुक्त गस्ती टोलीले रातीको समयमा तस्कर गफूर नदाफको गाई गोठ बाट  २ लाख १३ हजार रुपैयाँ बराबरको मटर सहितका सामानहरु भन्सार चोरी गरी राखिएको अवस्थामा पक्राउ गरी भन्सार कार्यालयमा दाखिला गरिएको छ । तस्कर नदाफ भने पक्राउ नपरेको मिश्रले बताए । 

त्यसै गरी जिल्ला ट्राफिक प्रहरी कार्यालय धनुषा सहित नेपाल प्रहरीले जिल्लाको बिभिन्न स्थान बाट भन्सार छली गरिएको तथा तस्करीमा प्रयोग गरिएको सवारी साधनलाई समेत पक्राउ गरी भन्सार दाखिला गराएको उनी बताउँछन् ।  भदौ महिनामा मात्रै ७ थान मोटरसाइकल, १ थान बोलेरो र २ थान पिकअप सहित १३ जना मानिसलाई  १ करोड ८ लाख ७२ हजार ६८० रुपैयाँ मूल्य बराबरको सामान बुझाइएको उनले बताए । 

‘जिल्लामा तस्करीलाई नियन्त्रण गर्नका लागि पहिले देखि रहेको मातहतको प्रहरी चौकी बाहेक दुई जना प्रहरी निरीक्षकको कमाण्डमा प्रत्येक दिन रातिको समयमा छुट्टा छुट्टै सीमा नाकामा थप प्रहरी परिचालन गरेका छौं,’ डिएसपी मिश्रले लोकान्तर सँग भने,‘जिल्ला बाट परिचालन हुने प्रहरी निरीक्षकहरूको कमाण्डको टोलीलाई थप क्रस अनुगमन गर्न म आफै पनि राती राती अनुगमनमा जाने गरेको छु ।’ जिल्लामा तस्करीलाई शून्य सहनशीलताको रणनीति अपनाउँदै जिल्लाको छुट्टै टोली बाहेक अहिले प्रदेश २ प्रहरी कार्यालय, संघीय प्रहरी इकाईको कार्यालयको संयुक्त अनुगमन टोली सहित छुट्टा छुट्टै टोली समेत परिचालन भएको उनले बताए ।
 
तल देखि माथि  सम्मको सेटिंगमा जिल्लामा तस्करी बढेको समाचार लोकान्तरले यस अघि प्रकाशन गरे पछि प्रहरीले सक्रियता बढाएको छ ।

यो पनि पढ्नुहोस्

दुहबी नाकामा तस्करीका बादशाह महासेठ : आमादेखिको विरासत, दुवै देशको नागरिकता लिएर धन्दा !