लेग स्पिनर सन्दीप लामिछानेको बलिङ बरियता खस्किएको छ ।

अन्तर्राष्ट्रिय क्रिकेट परिषद् (आईसीसी)ले सार्वजनिक गरेको टी २० बलिङ बरियतामा सन्दीप एक स्थान खस्किएको हो ।

नयाँ बरियतामा सन्दीप ८० औं स्थानमा रहेका छन् । उनले कूल ३८९ रेटिङ अंक पाएका छन् । यसअघि आईसीसीले सार्वजनिक गरेको बरियतामा उनी ७९ औं स्थानमा रहेका थिए ।

हाल क्यारेवियन प्रिमियर लिग (सीपीएल) खेल्ने क्रममा उनी ट्रिनिडाड एण्ड टोबागोमा रहेका छन् । उनले प्रतियोगितामा ११ खेलमा १२ विकेट प्राप्त गरेका थिए ।

विश्व बलिङ बरियतामा अफगानिस्तानका राशिद खान र मुजिबउर रहमान क्रमशः पहिलो र दोस्रो स्थानमा रहेका छन् । दुवै जना हाल सीपीएल खेलिरहेका छन् । सीपीएलमा राशिदले बार्बाडोसबाट तथा मुजिबउरले जमैकाबाट खेलेका थिए ।

आईसीसीको बलिङ बरियतामा अस्ट्रेलियाका एस्टन अगर तेस्रो, दक्षिण अफ्रिकाका ताब्रेज सामी चौंथो तथा अस्ट्रेलियाकै एडम जाम्पा पाँचौं स्थानमा रहेका छन् ।

आईसीसीले जारी गरेको ब्याटिङ वरियतामा नेपालका पूर्व कप्तान पारस खड्का ७० औं स्थानमा रहेका छन् । उनको ४०० रेटिङ अंक छ । इंग्ल्यान्डका डाविड मालन टी २० ब्याटिङ बरियताको शीर्ष स्थानमा रहेका छन् । पाकिस्तानका बाबर आजम दोस्रो स्थानमा रहेका छन् ।

टी २० बरियतामा नेपाल १५ औं स्थानमा यथावत छ । यसअघि नेपाल विश्व बलिङ बरियतामा ११ औं स्थानसम्म पुगिसकेको छ । शीर्ष बरियतामा भने अस्ट्रेलिया छ । बरियतामा इङ्ल्याण्ड दोस्रो, भारत तेस्रो, पाकिस्तान चौथो र दक्षिण अफ्रिका पाँचौं स्थानमा छन् ।