नेपाल कम्युनिस्ट पार्टी (नेकपा) सचिवालय बैठक आइतवार पहिलोपटक पार्टी केन्द्रीय कार्यालय कोटेश्वर पेरिसडाँडामा बसेको छ । यसअघि अधिकांश बैठक प्रधानमन्त्री निवास बालुवाटारमा बस्दै आएका थिए । 

तत्कालीन माओवादी केन्द्रको पार्टी केन्द्रीय कार्यालय रहेको कोटेश्वर पेरिसडाँडामा सचिवालय बैठक शुरू भएको हो । सचिवालय बैठकमा प्रधानमन्त्री एवं पार्टी अध्यक्ष केपी शर्मा ओली, अर्का अध्यक्ष पुष्पकमल दाहाल प्रचण्ड लगायतलाई समान सीटको व्यवस्था गरिएको छ । 

असार १० गते शुरू भएको स्थायी कमिटी बैठकमा सचिवालयका सदस्यहरूलाई विशेष कुर्सीसहित मञ्चमा राखिएकोमा विरोध भएको थियो ।

कम्युनिस्ट पार्टीका नेताहरूले सामान्ती चरित्र देखाएको भन्दै स्थायी कमिटी सदस्यहरूले विरोध जनाएपछि मञ्चमा राखिएका कुर्सी सदस्यसरह भुइँमा झारिएको थियो । 

नेकपाभित्र कुर्सी व्यवस्थापनको विषयलाई लिएर समेत विवाद हुने गरेको छ । २०७५ जेठ ३ गते पार्टी एकतापछि नेकपा सचिवालय बैठक पहिलोपटक पेरिसडाँडामा बसेको हो । 

बैठकमा सहभागी सदस्यहरूको अगाडि नेमप्लेट सहित टेबल व्यवस्थापन गरिएको छ ।

बैठकमा मन्त्रिपरिषद् पुनर्गठन, महाधिवेशनको तयारी लगायत समसामयिक विषयमा छलफल हुने एक सचिवालय सदस्यले जानकारी दिए ।