रुसका विशेष सुरक्षाबलहरूले आफूलाई जिसस क्राइस्टको नयाँ अवतार दाबी गर्ने एक पूर्व ट्राफिक प्रहरीलाई पक्राउ गरेका छन् । 
 

भिस्सारियोन भनिने सर्गे तोरोप र उनका निकटतम सहयोगी भादिम रेडकिनलाई पक्राउ गरिएको हो । 
 

तोरोपले आफू सन् १९९० मा ईश्वरको पुत्रका रूपमा पुनः जन्मेको दाबी गरेका छन् । उनी ५९ वर्षका भए । 

रुसी एजेन्टहरूले ठूलै सैन्य कारवाही चलाएर उनलाई पक्राउ गरेका हुन् । त्यसक्रममा चारवटा हेलीकप्टर र दर्जनौं सशस्त्र सैनिकहरू तैनाथ गरिएका थिए । 

रुसको अनुसन्धान समितिले तोरोपको समूहले मनोवैज्ञानिक हिंसा गर्ने गरेको र केही अनुयायीहरूको स्वास्थ्यमा गम्भीर हानि पुर्‍याएको विषयमा छानबिन थालिएको बताएका छन् । 
 

सर्गे तोरोप र अन्य नेताहरू भादिम रेडकिन र भ्लादिमिर भेदेर्निकोभलाई पक्राउ गरिएको भनी बयान जारी गरिएको छ । 

उनीहरूलाई दुई वा बढी मानिसलाई गम्भीर शारीरिक हानि पुर्‍याइएको आशंकामा पनि अनुसन्धान गरिएको छ । 
 

साइबेरियाको कुरागिन्स्की जिल्लामा उनीहरूलाई पक्राउ गरिएको हो ।