रौतहटका शुभनारायण पटेल सोमवार नाइट बस चढेर काठमाडौं आए ।

काठमाडौं आउनुभन्दा अगाडि घरबेटीलाई फोन गरेर आफू आउन लागेको जानकारी दिएका थिए, तर घरबेटीले कोरोना परीक्षण गरेर नेगेटिभ रिपोर्ट आएको खण्डमा मात्रै घरमा बस्न दिने बताए । 

मंगलवार बिहान ५ बजे काठमाडौं झरेपछि उनी कोरोना परीक्षणका लागि बिहान ६ बजे शुक्रराज ट्रपिकल तथा सरुवा रोग अस्पताल टेकुमा आएर लाइन बसे । उनी आउँदा लगभग २ सयभन्दा धेरै लाइन बसिसकेका रहेछन् । 

पटेल लाइनमा उभिए, बिहानदेखि बेलुकासम्मै कुरे, तर पालो आएन । बिहान र  दिउँसो चाउचाउ खाएर भोक टारे । तर बेलुकासम्म पनि पालो नआएपछि उनी रातभरि अस्पतालको भुइँमा सुते । 

आज (बुधवार) बिहान २ बजे उठेर लाइनमा बसे तर पनि उनले १४२ नम्बरको टोकन पाएका छन्, तर उनलाई आज पनि पालो आउने विश्वास लागेको छैन ।

मंगलवार रातभरि र बुधवार पनि बिहानैदेखि झरी परेकाले उनीहरू निथ्रुक्कै भिजेर पनि टेकुमा कोरोना परीक्षणको पालो कुरिरहेका छन् । 

बन्दाबन्दीभन्दा अगाडि साइकलमा कपडा बेचेर परिवार पाल्दै आएका पटेल बन्द खुलेपछि छठ मनाउनका लागि केही पैसा कमाउन सकिन्छ कि भनेर आएका रहेछन् । 

कोरोना परीक्षणका लागि लाइनमै भेटिए, भारत मोतिहारीका पान्नालाल साह ।

ललितपुरको सानेपा बस्दै आएका पान्नालालले काठमाडौंमा साइकलमा फलफूल बेच्दै आएका थिए । कोरोना संक्रमण फैलिएपछि उनी भारत फर्किए ।

काठमाडौं उपत्यकामा निषेधाज्ञा खुलेपछि उनी नेपाल फर्किएका छन् ।

सनेपाको एउटा टिनको टहरामा बस्दै आएका उनलाई फलफूल साइकलमा बेच्न कोरोना परीक्षणको रिपोर्ट चाहिने भएपछि परीक्षण गराउन टेकुमा हिजो (मंगलवार) बिहानदेखि लाइन बसेका हुन्, तर अहिलेसम्म पनि उनको पालो आएको भने छैन । 

टेकुमा कोरोना परीक्षण गराउने अधिकांश तराई मूलका

बुधबार सरुवा रोग अस्पताल टेकुमा निःशुल्क कोरोना परीक्षण गर्ने लाइनमा तराईका जिल्लाबाट उपत्यका छिरेकाहरू बढी छन् ।

उपत्यकामा साइकल र ठेलामा व्यापार गर्दै आएका बारा, पर्सा, सर्लाही लगायतका तराईका जिल्लाबाट आउनेहरू लाइनमा भेटिए ।

बुधवारको दृश्य हेर्ने हो भने लगभग ९५ प्रतिशत तराईवासी नेपाली तथा भारतीय नागरिक थिए ।

भारतीयहरू पनि कोरोना परीक्षणका लागि टेकुमा 

टेकुमा कोरोना परीक्षण गर्न लाइन लाग्नेमा भारतीयहरू पनि प्रशस्तै छन् ।

भारतको मोतिहारी घर बताएपनि नाम बताउन नचाहेका एक जनाले आफू बुवाआमा र छोराछोरीसँगै सोमवार वीरगञ्ज नाका हुँदै काठमाडौं आएको बताए ।

काठमाडौंमा साइकलमा कपडा व्यापार गर्ने उनी कोरोना परीक्षणका लागि टेकु आइपुगेका रहेछन् ।

‘उता हामी जस्तो गरीबले कोरोना परीक्षण गर्न कहाँ पाउनु, म नेपाल बस्दै आएकाले बुवाआमा लिएर आएको हुँ,’ ती व्यक्तिले लोकान्तरसँग भने ।

७५ वर्षका बुवा र ७० वर्षकी आमासहित उनी लाइनमा बसेका छन् ।

आइतवार बिहान भारतबाट १६ जनाको टोली काठमाडौं आएको रहेछ । टेकुको एक गार्मेन्टमा काम गर्ने रामजनम साह सहितको टोली गार्मेन्टमै बसेको थाहा पाएपछि स्थानीयले दबाब दिएर कोरोना परीक्षणका लागि टेकु पठाएका रहेछन् ।

लकडाउनको समयमा स्वदेश फर्किएका उनीहरू वीरगञ्ज हुँदै काठमाडौं आएका रहेछन् ।

कोरोना परीक्षणका लागि शुक्रराज ट्रपिकल तथा सरुवा रोग अस्पताल टेकुमा २ दिनदेखि लाइनमा बस्दा पनि उनीहरूको पालो आएको छैन ।

सरकारले कोरोना परिक्षणका लागि निःशुल्क तोकिदिएको शुक्रराज ट्रपिकल तथा सरुवा रोग अस्पतालमा टेकुमा कोरोना परीक्षण लामै लाइन थियो ।

सरकारले लामो तथा छोटो दुरीका सार्वजनिक यातायात सञ्चालन गर्न दिएपछि देशका विभिन्न भू–भाग र भारतबाट काठमाडौं भित्रिनेको संख्या बढेको छ । त्यसको प्रभाव टेकुको लाइनमा पनि देखिएको छ ।