उत्तर कोरियाली सैनिकहरूले दक्षिण कोरियाका एक माछापालन अधिकारीलाई गोली हानी मारेको दक्षिणको रक्षा मन्त्रालयले बिहीवार जनाएको छ । यो आक्रामक गतिविधि भएको दक्षिणको कथन छ । 

ती ४७ वर्षीय दक्षिण कोरियाली अधिकारी गश्ती डुंगाबाट हराएका थिए र प्योङयाङ नजिकको समुद्री क्षेत्रमा पुगेका थिए । उनी सीमावर्ती टापु योनप्योङमा डुंगामा चढेका थिए । 

सूचना विश्लेषण गरेपछि दक्षिण कोरियाको सेनाले आफ्ना नागरिकमाथि उत्तरले समुद्री क्षेत्रमा गोली हानेर मारेको र उनको शरीर जलाएको पुष्टि गरेको छ । 

‘यस घटनाको पूर्ण जिम्मेवारी उत्तर कोरियाले लिनुपर्छ भनी हामी कडा चेतावनी दिन्छौं,’ दक्षिण कोरियाली सेनाले बतायो । 

ती व्यक्ति कसरी प्योङयाङ नजिक पुगे भन्ने स्पष्ट हुन सकेको छैन । उनका जुत्ताहरू गश्ती डुंगामा भेटिएकाले उनी भागेर उत्तर जान खोजेका हुन् कि अनुमान गरिएको थियो ।

गत जुलाई महिनामा उत्तर कोरियाबाट तीन वर्षअघि भागेर दक्षिण पुगेका एक व्यक्ति सुटुक्क उत्तरमा प्रवेश गरेका थिए । 

त्यसपछि उत्तर कोरियाका अधिकारीहरूले सीमावर्ती शहर काएसोङमा लकडाउन लगाए । उनले कोरोना बोेकेर आएको आशंकामा लकडाउन लगाइएको थियो । 

अमेरिकी सेनाका कोरिया कमान्डर रोबर्ट अब्राम्सले यसै महिनाको आरम्भतिर दिएको जानकारीअनुसार, चीनबाट कोरोनाभाइरस लिएर कसैले प्रवेश नगरून् भनी उत्तर कोरियाली अधिकारीहरूले देख्नेबित्तिकै गोली हान्ने आदेश दिएका छन् । सीमामा एउटा मध्यवर्ती क्षेत्र बनाएर विशेष सैनिक बललाई गोली हान्नका लागि तम्तयार बनाएर राखिएको छ ।