मध्य रुसमा सैन्य अभ्यासका क्रममा सु–३० लडाकू विमानलाई भूलवश अर्को विमानले तोप हानेको हुनसक्ने स्थानीय सञ्चारमाध्यमहरूले जनाएका छन् । विमानका चालकहरू सुरक्षित रूपमा बाहिरिए तर विमान भने क्षतिग्रस्त भयो ।

सन् २०१२ मा ५ करोड डलर परेको उक्त विमान रुसको त्वेर क्षेत्रमा मंगलवार खसेको थियो । दुई चालक दुर्घटनामा बाँच्न सफल भए र उद्धार गरिए । उनीहरूको अवस्था सन्तोषजनक रूपमा सामान्य रहेको रुसको पश्चिमी सैन्य कमान्डले जानकारी दियो । 

सेनाले दुर्घटनाका बारेमा केही नबताएपनि विभिन्न सञ्चारमाध्यमहरूले विमानलाई खसाइएको लेखेका छन् । प्रारम्भिक खोजमा उक्त विमानलाई सैन्य अभ्यासका क्रममा अर्को विमानले तोप हानेको एक अज्ञात स्रोतले तास समाचार संस्थालाई बतायो । 
 

कोम्मरसान्त दैनिक पत्रिकाले थप विवरण दिँदै विमानलाई अर्को विमानको अटोक्यानन शेलले प्रहार गरेको लेख्यो । विमानहरूले अभ्यासका क्रममा गोलीगट्ठा वा क्षेप्यास्त्र सामान्यतया नबोक्ने भए पनि त्यो विमानले अटोक्यानन बोकेको रहेछ । तोपले सु–३० विमानको पुच्छरमा प्रहार गरेको थियो । 

विमानका टुक्राहरू एक जंगलमा छरिएको देखिएको छ । 

Выжег поляну. Лайф публикует видео с места крушения Су-30 под Тверью: https://t.co/BFN92t5D9g pic.twitter.com/H2bhjwD0cY

— lifenews_ru (@lifenews_ru) September 23, 2020