गत फरबरीमा चीनको वुहानमा कोरोनाभाइरसको रिपोर्टिनङ गर्न जाँदा हराएका पत्रकार चेन किउसी अहिले आफ्नो घरमा फेला परेका छन् ।

कानून व्यवसायीसमेत रहेका ३४ वर्षका चेन कोरोना भाइरसको रिपोर्टिङ गर्न वुहान गएलगत्तै हराएका थिए । उनले कोरोना भाइरसले वुहानमा ल्याएको भयावह समस्याबारे बनाएका सामग्री इन्टरनेटमा राखेका थिए । जसका कारण विश्वलाई चीनको वुहानमा के भइरहेको छ भन्ने थाहा भयो ।

झन्डै ८ महिना यता कसैको सम्पर्कमा नआएका पत्रकार चेन अहिले चिनियाँ सरकारको निगरानीमा घरमै रहेको उनका साथीहरूले बताएका छन् । उनी पूर्वी चीनको किंगदो शहरमा बस्छन् ।

चेन वुहानमा लक-डाउन शुरू हुनेबित्तिकै पुगेका थिए । उनले कोरोना भाइरस संक्रमणका कारण बिरामी हुने र मृत्यु हुनेहरूको तस्वीर र भिडियो सार्वजनिक गरेका थिए ।

केही दिनमा नै उनी गायब भए । उनी हराएको खबर ट्वीटरबाट सार्वजनिक भएको थियो । उनी हराएपछि उनकी आमाले आफ्नो छोरा खोजिदिन भन्दै एक भिडियो सन्देश जारी गरेकी थिइन् ।