सरुवा भएर २ नम्बर प्रदेशको भूमि व्यवस्था, कृषि तथा सहकारी मन्त्रालयमा आएकी सचिव सम्झना काफ्लेले कार्यालयमा हाजिरी गर्न पाएकी छैनन् । 

असोज ७ गते बुधवार नै मन्त्रालयमा पुगेकी काफ्लेले हालसम्म न त कार्यकक्षमा प्रवेश गर्न पाएकी छन्, न त हाजिरी पुस्तिकामा हाजिरी गर्न पाएकी छन् ।

‘असोज ७ गते मन्त्रालयमा हाजिर हुन गएको बेला मैले न त आफ्नो च्याम्बर पाएँ, न त हाजिरी रजिस्टर नै पाएँ,’ काफ्लेले लोकान्तरसँग भनिन्, ‘मन्त्रीज्यूका स्वकीय सचिवले मेरो कार्यकक्षको ढोकामा ताला बन्द गरेका थिए र हाजिरी पुस्तिका पनि उनले नै आफ्नो कब्जामा राखेका थिए ।’ स्वागत तथा परिचयको क्रममा सबै कर्मचारीले अनुशासनको दायरामा नै बसे पनि मन्त्रीका स्वकीय सचिवले बाहिरका केही व्यक्ति बोलाएर कर्मचारीविरुद्ध हल्लाखल्ला गराउने र दुर्व्यवहार गराउने काम गरेको उनले बताइन् ।

कार्यकक्षमा प्रवेश गर्न नपाए पनि आफूले पत्र बनाएर मन्त्रालयमा हाजिर भइसकेको पत्र संघीय सरकारको सामान्य प्रशासन मन्त्रालय, आफू रवाना भएर आएको निकाय पशु सेवा विभाग, प्रदेशको मुख्यमन्त्री कार्यालय, निजामती किताबखाना, कर्मचारी सञ्चय कोष लगायतका निकायमा जानकारी गराइसकेको उनले बताइन् । ‘मन्त्रालयमा अवरोध गरिएको भए पनि औपचारिक रूपमा असोज ७ गते नै म हाजिर भइसकेको छु,’ सचिव काफ्लेले भनिन्, ‘मधेश भवनस्थित निवास समेत पाएको र मन्त्रालयको गाडी र सवारी चालक समेत पाएर मन्त्रालयका विभिन्न निकायको अनुगमन समेत गर्दैछु ।’

भूमि व्यवस्था, कृषि तथा सहकारी मन्त्री शैलेन्द्र साहका स्वकीय सचिव नवनीत झा हुन् । झाले नै हाजिरी पुस्तिका कब्जामा राखेको कारण बुधवारदेखि आइतवारसम्म मन्त्रालयका बाँकी कर्मचारीले समेत हाजिरी गर्न पाएका छैनन् । ‘बुधवारदेखि मन्त्रालयका कर्मचारीले पनि हाजिरी पुस्तिका नपाएका कारण हाजिरी गर्न पाएका छैनन्,’ मन्त्रालयमा यसअघि निमित्त सचिव रहेका विजयकुमार महतोले भने ।

सचिवको कार्यकक्षमा ताला लगाउने तथा हाजिरी पुस्तिका कब्जामा लिने अधिकार स्वकीय सचिवको  नहुने हुँदा गैरकानूनी काम भएकाले कर्मचारीले हाजिरी गर्न नपाएको ३ दिनको हाजिरी के गर्ने भन्ने विषयमा प्रमुख सचिवसँग छलफलपछि निर्णय लिइने काफ्लेले बताइन् ।

कम्तिमा १ वर्ष पनि नहुँदै सचिवहरूको सरुवा हुने भएकाले विरोधस्वरूप कार्यकक्षमा तालाबन्दी गरिएको मन्त्री साहका स्वकीय सचिव झाले बताए । ‘मन्त्रीज्यूले मुख्यमन्त्री कार्यालयदेखि संघीय सरकारको सामान्य प्रशासन मन्त्रालयसम्म कम समयमै सचिवको सरुवा नगर्न भनेर पत्राचारसहित डेलिगेसन नै गएको भए पनि ६ महिना नबित्दै सरुवा गरिदिने गरेका छन्,’ झाले भने, ‘त्यसैको विरोध स्वरूप हाजिर हुन अवरोध गरिएको हो ।’ सचिवको ढोकामा ताला लगाएको भए पनि हाजिरी पुस्तिका आफ्नो कब्जामा नरहेको तथा कर्मचारीकै जिम्मामा रहेको उनले दाबी गरे ।

‘कहिले कृषि त कहिले भेटेरिनरीका सचिव आउँछन्, काम बुझ्न नै १–२ महिना लाग्छ । काम बुझ्न थाल्यो र अलि गति लियो कि सचिवको सरुवा भइहाल्छ,’ झाले भने, ‘त्यसकारण कार्यसम्पादन राम्रो तरिकाले हुँदैन ।’ छोटो समयमै सचिवको सरुवा गर्ने संघ सरकारको प्रवृत्तिको विरोध स्वरूप सचिवलाई हाजिरी हुन नदिइएको उनले बताए ।

मन्त्रालयमा शुरूमा डा. विजयचन्द्र झा, डा. वंशी शर्मा, फेरि डा. विजयचन्द्र झा, गोविन्दप्रसाद शर्मा, विमल कुमार निर्मल सचिव भइसकेका छन् । पशु सेवा विभागका उपमहानिर्देशक सम्झना काफ्ले हाल सचिव भएर आएकी छन् । सचिवहरू सरुवा भएर जाने गरेपछि मन्त्रालयको नापी विभागका प्रमुख विजय कुमार महतोलाई निमित्त सचिव बनाउने गरिएको छ ।

‘अहिलेसम्म १२ पटकभन्दा पनि बढी मन्त्रालयको निमित्त सचिव भइसकेको छु,’ महतोले भने ।