घूस खुवाएर गोल्ड मेडल लिएको अभियोगमा भक्तपुर बहुमुखी क्याम्पसका अध्यापक सुरेन्द्रप्रसाद कोइरालालाई विशेष अदालतले ४ लाख ५७ हजार रुपैयाँ जरिवाना र १४ महिना कैद सजाय सुनाएको छ ।

अध्यक्ष शिवराज अधिकारी र सदस्यहरू बालेन्द्र रूपाखेती र रवि शर्मा अर्यालको इजलासले बुधबार कोइरालासहित अरू २ जनालाई प्रश्नपत्रको गोपनीयता भंग गरेको र घूस खुवाएको फरक अभियोगमा सजाय सुनाएको हो ।

उक्त आरोप लागेका केदार भट्टराईलाई ११ महिना कैद र तीन लाख ५ हजार जरिवानाको फैसला भएको छ । यी दुवैसँग घूस लिएको र प्रश्नपत्र गोपनीयता भंग गरेको आरोपमा परीक्षा नियन्त्रण कार्यालय बल्खुको एमए गोप्य शाखाका अधिकृत रामबहादुर कर्माचार्यलाई ११ महिना कैद र एक लाख ५५ हजार रुपैयाँ जरिवानाको फैसला सुनाइएको छ ।

शिक्षण सहायक कोइरालामाथि त्रिभुवन विश्वविद्यालयको परीक्षा नियन्त्रण कार्यालयभित्र सेटिङ गरेर अंक बढाएको र त्यसका आधारमा प्रथम श्रेणी पाउनुका साथै सर्वप्रथम भएर गोल्ड मेडलसमेत जितेको आरोप थियो ।

एमए इकोनोमिक्समा उनले सबै परीक्षार्थीको भन्दा बढी प्राप्तांक ल्याई सन् २०१९ को दीक्षान्त समारोहमा गोल्ड मेडल लिएका थिए । उनले शाखा अधिकृत कर्माचार्यलाई एक लाख ५० हजार रुपैयाँ घूस
दिएको अख्तियार दुरुपयोग अनुसन्धान आयोगले आरोप लगाएको थियो । कोइरालाले यसअघि नै ४ वटा विषयमा स्नातकोत्तर तह पास गरेका थिए ।

अख्तियारले भट्टराईमाथि ५ पेपरमा १०/१० अंकका दरले ५० अंक बढाउन ३ लाख घूस दिएको आरोप लगाएको थियो । उनी बानेश्वर बहुमुखी क्याम्पसमा कामु प्रशासनिक अधिकृत छैटौं तहमा कार्यरत थिए । कान्तिपुर दैनिकमा खबर छ ।