अहिले संसार कोरोनाभाइरससँग लडिरहेको छ । सन् २०२० कोरोनासँग डराएरै बितेको छ । 

यसैबीच आज अक्टोबर १ मा विश्व शाकाहार दिवस परेको छ । 

शाकाहारी जीवनशैली अपनाउँदा विभिन्न किसिमका महामारीहरूबाट बच्न सकिन्छ । मांसाहारको बानीले गर्दा नै कोरोना महामारी फैलिएको हो । 

सेन्टर्स फर डिजीज कन्ट्रोल यान्ड प्रिभेन्सनका अनुसार, हामी दिनदिनै अनेकथरी पशुको सम्पर्कमा हुन्छौं । जनावरमा भएका कीटाणुहरूले मानिसलाई बिरामी बनाउँछन् । पशुबाट मानिसमा पुग्ने कीटाणुमा हुने रोगलाई जूनोटिक भनिन्छ । यसले मृत्युुसमेत गराउन सक्छ । 

वैज्ञानिकहरूको अनुमानअनुसार, १० मध्ये ६ संक्रमण जनावरबाट मानिसमा सर्छ । अनि प्रत्येक ४ नयाँ तथा उदीयमान सरुवा रोगमध्ये तीनवटा पशुबाट आउँछ । 

पशु हितमा काम गर्ने संस्था पेटाका अनुसार, भोजनका लागि पशुपालन गर्ने काम खराब हो किनकि जनावरहरूले ज्यादा अनाज खाएर थोरै मासु, दुग्ध पदार्थ वा अण्डा उपलब्ध गराउँछन् । जनावरको एक किलो मासुका लागि १० किलोसम्म अनाज खुवाउनुपर्ने हुन्छ । 

वर्ल्ड वाच इन्स्टिच्युटका अनुसार, संसारमा प्रत्येक ६ मध्ये एक व्यक्ति राति भोकै सुत्छ । यस्तो विकराल अवस्थामा मांस उत्पादन गर्दा अनाजको दुरुपयोग हुन्छ । अनाज सीधै मानिसले उपयोग गर्ने हो भने बढी असरदार हुन्छ । 
 

पेटाका अनुसार, शाकाहारी भोजनले संसारमा भोकमरी अन्त्य गर्न सक्छ । शाकाहारी जीवनशैली अपनाउँदा सन् २०५० सम्म अनुमानित ९०० करोड मानिसका लागि धर्तीमा पर्याप्त खाद्यान्न हुन्छ । अनाजको ४० प्रतिशत उत्पादन भोजनका लागि पालिने जनावरको साटो सीधै मानिसलाई दिए मात्र यो सम्भव छ । 
 

शुद्ध शाकाहारी भोजनका लागि दिनको ११ सय ३० लिटर पानी आवश्यक पर्छ भने मांसाहारी भोजनका लागि दिनदिनै १५ हजार लिटरभन्दा बढी पानी आवश्यक हुन्छ । 

विश्व स्वास्थ्य संगठनको आकलन अनुसार, प्रत्येक वर्ष जुनोसिसका कारण लगभग एक अर्ब मानिस अनेकथरी रोगको शिकार बन्छन् र लाखौंले ज्यान गुमाउँछन् । मासु, दुग्ध पदार्थ तथा अण्डाका कारण मोटोपन, क्यान्सर, मधुमेह तथा नपुंसक बन्ने समस्या आउँछन् भने शाकाहारीहरूमा यस्ता समस्या ५० प्रतिशत कम हुन्छ ।