प्रहरी निरीक्षक (इन्सपेक्टर) को बर्दी लगाएर नक्कली परीक्षा सञ्चालन गर्ने नक्कली इन्स्पेक्टरलाई जिल्ला प्रहरी कार्यालय पर्साले पक्राउ गरेको छ ।

इन्सपेक्टरको बर्दी लगाएर लोक सेवा आयोगबाट हुने खरिदारको लिखित परीक्षा, प्रहरी सहायक निरीक्षक र राष्ट्रिय अनुसन्धान विभागको सहायक सूूचकको परीक्षा लिइरहेको अवस्थामा प्रहरीले वीरगञ्ज महानगरपालिका–१६ स्थित देव पार्टी प्यालेसबाट बुधवार दिउँसो इन्स्पेक्टरको बर्दी लगाएका बारा जितपुर सिमरा उपमहानगरपालिका–७ चौधरी टोलका २९ वर्षीय अजयकुमार रायलाई नियन्त्रणमा लिएको हो ।

जिल्ला प्रहरी कार्यालय पर्साका प्रवक्ता प्रहरी नायव उपरीक्षक (डीएसपी) मनोजित कुँवरले बताए ।

‘परीक्षा सञ्चालन गर्दैगर्दा विशेष सूचनाको आधारमा वीरगञ्जको देव पार्टी प्यालेसबाट पक्राउ गरेका हौं,’ डीएसपी कुँवरले भने ।

परीक्षामा २१ जनाले सहभागी जनाएका थिए । परीक्षास्थलबाट नक्कली प्रहरी सहायक निरीक्षकको प्रवेशपत्र २, राष्ट्रिय अनुसन्धान विभागको सहायक सूचककोे पदको प्रवेशपत्र २१, खरिदारको प्रवेशपत्र १ र २६ प्रश्नपत्रसहित प्रहरी निरीक्षकको बर्दीसहित पक्राउ गरेको थियो ।

परीक्षा हलबाट उनका सहयोगी जितपुर सिमरा उपमहानगरपालिका–५ निवासी हिरालाल महतो, बसन्त चौधरी, वीरगञ्ज–१६ का २१ वर्षीय रविकुमार चौरसिया, पकाहामैनपुर गाउँपालिका–५ सबैठवाका शिवनारायण चौरसिया, वीरगञ्ज–११ रानीघाट निवासी २५ वर्षीय रामजी चौरसियालाई समेत प्रहरीले नियन्त्रणमा लिएको छ । तर ती सहयोगीलाई पनि गुमराहामा राखेर परीक्षा सञ्चालन गरेको पाइएको डीएसपी कुँवरले लोकान्तरलाई बताए ।

रायले ९ महिना अघिदेखि जिल्लाका विभिन्न चौकीमा जाने, प्रहरी निरीक्षक भएको कुरा विश्वास दिलाउँदै आएका थिए । कोरोना भाइरस संक्रमणको समयमा रोकिएको परीक्षा सञ्चालनको लागि ९ महिनादेखि योजना बनाएको देखिएको छ ।

परीक्षार्थीलाई जम्मा गरेर काठमाडौंबाट बर्दी किनेर परीक्षा सञ्चालन गरेको पाइएको डीएसपी कुँवरले बताए । प्रहरीको प्रारम्भिक अनुसन्धानमा १३ जना परीक्षार्थीसँग १ हजार, १० हजारदेखि १ लाख ५० हजार गरी ३ लाख ६१ हजार रुपैयाँ उठाएको देखिएको छ । 

२०७२ सालमा बारा जिल्लामा सरकारी छाप दस्तखत कीर्ते गरेको मुद्दामा ११० दिन पुर्पक्षको लागि थुनामा बसेको देखिएको डीएसपी कुँवरले लोकान्तरलाई बताए । मुद्दामा सफाइ पाएपछि उनी छुटेका थिए । छुटेपछि इन्सपेक्टरको भेष धारण गरेर ठगीधन्दा शुरू गरेको पाइएको प्रहरीले जनाएको छ ।